Leap of Faith Foundation ta un fundacion cu a wordo funda recientemente, pero presidente di e fundacion, Terrence Ras, tin varios aña caba trahando pa e causa aki, cual ta yuda personanan cu discapacidad. Durante un rueda di prensa Ras a elabora ariba e meta di e fundacion, e proyecto cu nan ta trahando riba dje y tambe a anuncia un evento di recaudacion di fondo cu lo tuma luga dia 1 di mei.

Ras a conta cu su persona tin ya caba tres aña, bayendo pa cuater, trahando pa realisa e proyecto aki, basa ariba su mesun experiencia, ya cu e mes tabata den rolstoel y a logra cana back siendo cu en realidad e no mester ta canando back.

E proyecto aki ta trata di un pier den awa cu lo permiti personanan cu limitacion haci nan ehercicio cu mas facilidad. Di su propio experiencia den awa, Ras a splica, un dia sin sa el a ripara cu na cierto nivel di awa, e awa a yud’e kita tanto porcentahe di peso for di su curpa cu el a crea e oportunidad den su mente y haya e durf pa duna su prome stap den awa, despues di casi un aña cu e no tabata por a pone peso riba su pia.

Ras a remarca cu for di e tempo ey nunca el a lubida ariba e proyecto aki y door di 10 aña di experiencia cu e tin den management y innovacion rond di Aruba y rond mundo, el a wak suficiente formanan pa yuda logra bin cu mehoracion a Aruba, sobretodo den e parti cu e ta bay dedica na dje. “Door cu mi mes sa con e trato ta ora cu bo ta den rolstoel y no na Aruba so, pero esaki ta mundialmente”, el a expresa.

Locual e presidente di e fundacion a splica cu e kier trece dilanti ta un pier cu no ta djis pa sinta den awa, pero tambe caminda cu e personanan cu haci uso di e pier por haci ehercicio, tur e ehercicio cu tin di haber cu tur locual nan ta haya pa haci cerca nan terapistanan. Ras a indica cu e lo ta incorporando tambe tur ekiponan necesario pa ehercicionan aki den e pier cu ta bay funciona pa cuater hende.

“Den mi bista e ta unico aparato actualmente na mundo cu ta duna un hende e posibilidad di haci ehercicio den awa pa haci nan hopi mas facil. Nos tin cu corda algo hopi importante di hendenan den rolstoel of hendenan cu limitacion, hopi biaha nos no ta bay dilanti, nos no ta purba nada pa miedo di e dolornan cu bo ta haya”, el a señala.

Ras a sigui conta cu locual e personalmente a siña ta cu consistencia ta e yabi. Unabes un persona ta consistente, el a splica, e persona no ta perde musculo y ta forma un barera rond di e wesonan cu ta proteha e weso y asina por cuminsa haya mas musculo pa por lanta back y sigui train bay dilanti. “Un hende sinta constantemente, prome cos cu ta bay ta e musculonan y e ta esencial, y ami a logra cana back, door di train back tur dia”.

E meta principal di e pier aki, el a sigui splica, ta cu e mente ta liber, e persona ta confia por mes pa duna e prome stap. Y alabes e kier trece union den e area di parti di hendenan cu limitacion, den rolstoel, cu falta hopi pasobra segun el a subraya e ta sinti cu nan ta wordo lubida pa añas, y den su experiencia hopi biaha el a ripara cu e dedicacion e prome dianan ta bon, pero despues nan ta wordo lubida. “Ami ta comprometi pa trece un cambio den esaki”, Ras a enfatisa.

Pa loke ta trata e costo di e pier, Ras a señala cu alrededor di 10 luna pasa e pier, cu en realidad e lo desea di trah’e di aluminium pa motibo cu e ta un material mas light y ta haci e pier move mas exitoso den awa ora cu sak’e y hinke back, tabata 120 mil florin. Pero recientemente e costo a aumenta pa 250-300 mil florin. E aumento di prijs aki, Ras a splica, ta pa motibo cu costo di e material a subi cu un 60% na Aruba.

Na mesun momento Ras a splica tambe cu aworaki, mirando e costo halto di e pier si trahae di aluminium, e lo traha e pier di hero galvanisa. Cu e material aki, el a indica, e costo di e pier lo ta entre 35 pa 40 mil florin. Un suma significantemente mas abao compara cu e suma anteriormente menciona.

Pa yuda Leap of Faith Foundation yega na e proyecto aki, nan ta organisando un evento pa recauda fondo ariba diadomingo dia 1 di mei. E veto lo tuma luga na Funari, situa na Savaneta y lo conta cu presentacion di diferente artista local, lo tin benta di cuminda, pintamento di cara, dino jump y lo tin tayer di agricultura dicta pa Sr. Hensley Martina.

“Cualkier suma cu mi logra ta yuda pasobra ta ami cu mi señora di nos mesun budget ta haciendo esaki pa purba trece un cambio pa dilanti. Si mi logra haci esaki como prueba di e concepto, mi ta sigur cu tin hende cu lo kier inverti”, Ras a indica.

Por ultimo, aña pasa den luna di november, Leap of Faith a presenta nan prome proyecto, un pier tambe pa personanan cu discapidad por drenta awa y disfruta di e awa principalmente, y durante e presentacion aki tabatin presencia di diferente parlamentario como tambe di presidente di Parlamento di Aruba, Edgar Vrolijk. Pa loke ta trata apoyo of contribucion di parti di Gobierno di Aruba y Parlamento di Aruba, Ras a indica cu lastimamente te ainda e no a ricibi ningun ayudo for di nan.

“Nan a bisami cu e mesun siman ey nan lo contact mi back, pero esey no a pasa. Asina mes mi a invita nan tur, pasobra con cu bo wak e mi ta prefera di trece union den e pier ki y mi ta echt spera cu nan por duna parti tambe, at least pa dia di pon’e pa no haci ningun fastioso pa pne den awa. Ami no ta pidiendo nan placa”, Ras a remarca.