Aruba ta un di e destinacionnan mas caro y e turista a cuminza expresa critica riba locual ta ricibi pa e prijs
Turismo ta keda e unico entrada pa Aruba, y cambionan den actitud di e local pa e industria, pero tambe cambionan den leynan di belasting, por tin su efecto negativo pa e pais. Asina Director di ATA, Ronella Croes a bisa Bon Dia Aruba. Croes tin tur comprension pa e Arubiano, e local cu ta birando mas critico di e producto turistico.
“E calidad di producto ta importante particularmente pa e local,” cu segun director di ATA a bira mas critico, cu segun e, ta algo cu ta di compronde, pasobra ta e local ta mira e desaroyo tumando luga. “E sentimento ey no ta algo nobo. E sentimento den parti di comunidad cu kier mira menos desaroyo y hasta baha e cantidad, e ta presente. Y nos mester tin cautela cu esey, pasobra nos ta keda biba di turismo. E antagonismo mester ta bon maneha. Nos ta consciente di dje.”
Pero Croes ta enfatisa cu contrario na e percepcion, Aruba ta atrae un grupo di bishitante cu ta paga un prijs mas halto pa bin Aruba compara cu si nan a bay otro destinacion.
“Nos a caba di haci un estudio, aworaki na april, pa mira unda nos ta posiciona riba nivel di prijs, compara cu otro top destinacion den Caribe. Pa e segmento di luna di miel y di famia, nos ta e destinacion di mas caro. Si tuma acomodacion, vuelo, actividad, cuminda, bebida y transporte, Aruba ta esun mas caro. Esey ta un hecho. Pero e bishitante ta keda mustra disponibilidad pa paga e prijs. Esey kiermen cu ta sigui haya turista cu ta den un cierto perfil. Nos ta midie entre otro door di determina e ingreso anual di e persona cu ta bishita Aruba. Esey ta un di e manera di cu nos ta midi. Si nos bay den e ultimo decada, por mira cu e credito turistico, esta e entrada directo for di turismo registra pa Banco Central di Aruba a crece aña tras di aña (2011-2019). E ta mustra un crecemento anual di un averahe di cinco porciento. E entrada ta keda drenta y hendenan ta keda dispuesto pa paga y nan ta mustra di ta satisfecho cu nan vacacion.”
Pues, ainda Aruba ta ‘score’ bon cerca turistanan cu ta dispuesto pa paga mas. “Pero nos ta consciente di e sentimentonan den comunidad. Di otro banda, nos ta señala si cu e turista ta cuminza expresa si cu e no ta ricibi locual e ta paga p’e. E ta spera mas. Pa e prijs cu ta paga, e kier mas. Y esey ta locual ATA ta trece dilanti na autoridadnan,” Ronella Croes a bisa Bon Dia Aruba.
BTW y reforma di belasting
Un di e condicionnan cu Hulanda a mara na prestamo di likides pa sostene Aruba durante e pandemia tabata pa Aruba haci e reformanan di belasting cu Fondo Monetario Internacional (IMF) tin hopi tempo ta conseha pa haci. E reforma segun e landspakket mester simplifica e sistema di belasting y amplia e base di esnan cu ta contribui na caha di Gobierno pa medio di hala di un sistema directo pa uno indirecto. Pero, informacion cu ta saliendo di e presentacionnan di e plan di reforma, cu ta un producto di Aruba mes, ta ilustra un BTW of VAT (Value Added Tax) cu mester reemplasa BBO, BAZV y BAVP.
Warda dato prome cu tuma decision
Na e momentonan aki, un cerbes na St. Maarten ta mucho mas barata cu na Aruba. Turistanan ta paga e diferencia, pero ta remarca si. Director di ATA, Ronella Croes ta consciente di esey. “Esey ta netamente kico ATA ta treciendo dilanti. Nos a reuni cu diferente partido. For di aña pasa nos ta haciendo esaki, pa nos señala berdad cu nos mester haci analisis debido prome cu tuma decision. Locual ATA a haci awor aki caba, e prome paso tabata pa ‘update’ con nos ta posiciona awor den e costo di un vacacion pa Aruba.”
E investigacion cu ta contene e datonan mas recien, cu ta di e luna aki mes, ta e base. Awor basa riba e datonan aki, ATA lo haci diferente calculacion basa riba variablenan manera inflacion, e proposicion di belasting riba camber cu ta bay aumenta y asina lo sigui pone diferente componente pa haya un imagen mas completo di con e costo lo bay ta.
“E di tres paso lo ta pa nos analisa con esaki lo impacta demanda pa Aruba. Pues ta diferente paso cu nos ta tumando, pa ilustra kico ta e puntonan cu mester tene cuenta cune awor. Nos ta ilustrando cu ATA ta haciendo estudio y locual nos ta pidi ta pa (autoridadnan) ta consciente di esaki y warda pa e resultadonan di estudio pa tene na cuenta.”
Aumento di roomtax y cortamento den fondo pa ATA
Un di dos punto cu ATA ta hala atencion ta e tema di roomtax mes, esta e belasting riba camber. E intencion ta pa hisa esaki di 9.5 pa 12.5 porciento y e intencion ta pa disminui e parti di e entrada aki cu normalmente ta bay pa ATA. “Nos ta señala, cu pa prome cu tuma decision, mirando tur locual ta na caminda y tur e responsabilidad di ATA, pa anda cu cautela prome cu tuma decision di corta locual ta duna na e autoridad di turismo.”
ATA a contrata University of Central Florida, unda entre otro Dr. Jorge Ridderstaat ta forma parti di e team investigativo, pa haci analisis kico ta e minimo cu ATA mester pa e siguiente añanan. Esey ta otro ehempel pa traha a base di cautela y prudencia, pa haci analisis prome cu tuma decision, pa evita risiconan cu por impacta trabao di ATA negativamente. Si ATA tin impacto negativo y e tin refleho riba e trabou cu ATA por haci, e lo impacta ingreso pa Pais Aruba y esey lo crea mas complicacion.
Segun Director di ATA, tin un percepcion cu e autoridad di turismo tin hopi placa. “Mi ta bisa cu ta percepcion, pasobra den un aña normal nos ta inverti 60 a 65 miyon florin den mercadeo internacional. Y por ta nos a inverti den e producto turistico entre 5 a 7 miyon. E fondo pa mercadeo ta bay pa como 15 mercado internacional.”
Pa pone den contexto, e no ta placa cu ATA ta keda cune. Y locual ATA ta ricibi adicional riba presupuesto y no ta usa, ta bolbe pa caha di Gobierno. Dus den periodo normal, pa aña ATA ta duna Gobierno averahe pa aña desde cu el a bira ley, ta 13.2 miyon florin pa aña. “Nos ta bisa cu mirando e simpel hecho ey, nos por baha locual ta bin pa ATA. Pero solamente nos ta bisa cu ban wak prome unda ta bah’e y no sin mas trece daño na strategia di Aruba cu ta atrae turismo di un cierto perfil (entrada).
E Tourism Product Enhancement Fund, TPEF (Fondo pa Mehoracion Producto Aruba) ta como cuater (40 porciento di e roomtax pa aña. Gran parti di e inversion di producto turistico ta sosode medio di e fondo aki cu ta maneha pa ATA, banda di inversion di otro Ministerionan y departamentonan. No lo ta bay tin cambio den e porcentahe di e TPEF.
