(LaPatilla) – Den e ultimo tres simannan, prijs di algun producto di e basket basico a aumenta cu hasta un 10%, poniendo presion ariba productonan manera aros y azeta. Consumidornan ta sigura cu cada dia nan ta sinti mas contra muraya pasobra nan pension of salario minimo ta caba den un habri y cera di wowo.
Segun datonan registra, 15 dia pasa un kilo di aros tabatin un costo di Bs. 4,60, mientras cu ayera e tabata na Bs. 5,10. loke ta significa un aumento di 10%. Segundo categoria di producto cu tabatin un aumento di prijs di mesun porcentahe tabata azeta y su balor a pasa di Bs. 16,67 pa Bs. 18,80.
Den e caso di kilo di carni, e prijs por varia segun e establecimento, por ehempel den e mercadonan e prijs di un kilo di carni 15 dia pasa tabata Bs. 22, mientras cu ayera e prijs a yega Bs. 23, locual ta un aumento di 4%.
“A pesar di e aumento di pension, e placa no ta yega pasobra e prijs di cuminda ta sigui subi”, Salvador Rodriguez a splica, ken a wordo consulta. El a agrega cu 28 dollar nan no por come full un luna y cu e mester haci malabares pa e placa por yega.
Di acuerdo cu e Centro di Documentacion y Analisis Social di e Federacion Venezolano di Maestronan e basket basico di alimento na Venezuela den luna di maart ta ubica na $471,16 of Bs. 2115,50. Esey kiermen cu un pensionado mester mas di 16 luna di pension pa por adkiri e basket, pa e motibo aki nan ta keha ya cu dicho aumento no ta suficiente pa come.
