Rene Bernabela, presidente di sindicato TOPA: “No por ta asina cu gobierno no mester wak e interes di comunidad Arubiano”

Sindicato di Trahadornan Organisa di Sector Publico di Aruba (TOPA) ayera mainta a duna un conferencia di prensa pa informa comunidad cu den fin di siman sindicato TOPA a haci un evaluacion riba e sentencia cu recientemente a sali pa diferente sindicatonan cu a bay den accion pa loke ta trata recorte di salario di 12.6%.

Rene Bernabela, presidente di e sindicato aki, a splica cu nan como parti di sindicato den defensa di nan miembronan, un aña pasa nan a indica cu na momento cu gobierno a yama sindicatonan na mesa pa por papia mirando e situacion di crisis di pandemia sindicatonan a mustra nan preocupacion caminda segun el a sigura, nan a compronde pero nan no tabata satisfecho pa locual tabata sosodiendo.

Mirando e cantidad di lunanan cu sindicatonan y nan miembronan ta wordo afecta pa e recorte aki, “nan a bisa ta basta y nan tabata tira e culpa riba gobierno, pa asina nan y nan miembronan por a haya nan 12.6% di nan salario”, el a bisa.

Bernabela como lider di sindicato TOPA a conta cu e tempo ey nan a sali y duna nan puntonan di bista, caminda Bernabela a bisa enfaticamente cu sindicato TOPA no lo bay yama su miembronan pa bay ningun accion, “pasobra sindicato TOPA semper a y lo keda kere den dialogo. Anos ta kere cu den un dialogo ta caminda bo ta yega, sinta na mesa y bo ta haya solucion mas constructivo como partners den combersacion den e momento ey”, Bernabela a sigura.

E situacion a sigui desaroya caminda cuater diferente sindicato a tene accion di welga y otro formanan di accion ora nan a keda protesta cu nan tabata kier a haya 12.6% back den nan salario den nomber di nan miembronan, ademas el a señala cu dado momento gobierno a sinti e presion mirando cu Sindicato di Maestronan di Aruba (SIMAR) tabata kier bay over hasta pa recorta oranan di trabao di nan miembronan, momento unda gobierno a bisa cu a yega un limite y cu gobierno no lo acepta esey unda nan a entama un caso na Corte contra cada un di e sindicatonan.

Bernabela a comenta cu el a haya e diferente sentencia di cada sindicato unda cu segun su persona, algo cu a resalta di nan ta cu “sindicatonan mester compronde un cos, no por ta asina cu sindicatonan ta wak e interes di nan miembronan si nos ta papiando di 200 pa 800 miembro anto gobierno no mester wak e interes di e comunidad Arubiano, pasobra esey ta lo cual ta poni cu hues a bisa, no por ta asina cu cada rato miembronan ta bisa cu kier bay den accion y ta bay na nan sindicato, anto sindicato ta organisa un accion caminda ta pone presion riba gobierno cu nan kier back e 12.6% di nan salario”, Bernabela a menciona.

Na e momento ey Aruba tabatin mester di sosten di likides di Hulanda unda Bernabela a sigura cu esaki tambe a bin cu condicion di lo cual gobierno a informa e sindicatonan over di esaki, “gobierno a yega asina leu di bisa cu posiblemente lo por tin un solucion, si nos tur sinta na mesa hunto pa luna di juni 2022 cu lo cual gobierno tabatin intencion di paga e mita di 12.6% e aña aki y otro mita na 2023, pero ni asina mi ta kere e sindicatonan no kier a scucha pasobra nan a keda tira culpa riba gobierno cu nan kier e 12.6% completamente den nan salario back”.

Den su opinion, e sentencia cu e dos sindicato a haya ta marca historia di lo cual awe nos ta wak cu ta pone un mancha hopi scur riba e mundo sindical na Aruba, segun Bernabela e no ta tira e culpa riba lidernan sindical lo cual e sentencianan ta bisa pero su persona ta culpa e miembronan di sindicato, cu como miembronan nan ta esun cu por sa di haci nan preguntanan di un forma corecto “ no tabatin un miembro di un sindicato akinan na Aruba cu na momento cu nos tabata den pandemia no tabata haltura di kico tabata sosodiendo akinan na Aruba y no tabata aware di lo cual Aruba tabata hayando na e momento ey pa lo cual ta e sosten financiero di Hulanda”, el a specifica.

Tambe el a comenta cu den otro palabra “nos tur mester a keda calmo y ban tene cabes friu pa asina nos yega na un solucion”.

Segun el a afirma, sindicato TOPA tabata haya yamada di su miembronan pa asina haya sa si nan ta bay join e otro sindicatonan pa bay den accion pero den su opinion, “si sindicato TOPA a dicidi di uni na e accionnan aki, awe e sentencia lo a conta tambe pa sindicato TOPA cu semper a opta pa dialoga”.

Di mesun manera, tambe el a tende di cierto miembronan di sindicatonan pa keda pendiente riba cierto accionnan cu nan lo tin pensa di haci unda Bernabela a splica cu den sentencia hues tambe ta bisa cu cualkier sindicato na e momentonan aki cu kier haci cualkier accion pa loke ta trata recorte salarial di 12.6% “cu posiblemente lo por tin un ‘dwangsom’ cu lo por ta colgando riba nan cabes y nan tog ta keda insisti pa bin cu cualkier accion”, el a bisa.

Ta p’esey cu el a haci un yamada na cualkier miembro di cualkier sindicato aki pa nan pensa bon, haci preguntanan na boso lidernan sindical den casonan aki, di kico ta e interes mas importante di lo cual boso kier bay logra di recorte salarial di 12.6%.

Asina mes, el a reitera cu sindicato TOPA no ta defende gobierno pero pa lo cual ta nan banda, como parti di sindicato “awe nos a haya rason un biaha mas mirando e hecho cu for di comienso TOPA a opta pa dialoga y no pa bay den accion, esnan cu a bay den accion nan tin un sentencia devastador den nan contra cu no ta solamente pa e lidernan sindical sino specialmente pa nan miembronan”, Bernabela a finalisa.