(Infobae) – Ayera 25 di april den oranan di mainta e presidente Colombiano, Ivan Duque, a anuncia e suspension di uso di tapaboca na e pais. Aunke ya caba a wordo elimina na luganan habri, awor por evita su uso na luganan cera.
Dia 1 di mei e medida aki lo drenta na vigor na diferente zona di e pais unda cu vacunacion ta riba 70%. Di otro banda, emergencia sanitario lo wordo extendi te dia 30 di juni, loke ta nifica, dos luna mas di loke tabatin plania for di comienso, ora tabata programa pa anuncia su final e dia 30 di april.
Ministerio di Salud lo ta esun encarga di publica e lista unda ta menciona e municipionan cu a logra e avance di e vacunacion, loke lo permiti na diferente comunidadnan pa sa si nan lo adopta e medida of no. A pesar cu ta un orden presidencial, mester tene na cuenta cu uso di tapaboca lo sigui keda obligatorio na luganan di servicio di salud, casnan di cuido, transporte publico y espacio cera di scolnan.
Igualmente a duna instruccion pa e interior di e pais, e presidente Colombiano a destaca cu turistanan internacional cu lo yega na e pais mester tene su skema di vacunacion completo, den caso cu no lo tin esey, pa nan por sigui cu nan recorido nan lo mester presenta un prueba negativo di covid-19 cu no mag di supera 72ora of un test antigen di no mas di 48ora.
Ademas di eliminacion di e medida di tapaboca, lo elimina solicitud di carchi di vacunacion pa drenta na barnan, restaurant, discoteca, eventonan deportivo, cinema, biblioteca y museo. Esaki tambe lo cuminsa 1 di mei.
