Desaroyo di turismo ta e motor pa crecemento economico, pero e crecemento aki mester cumpli mas tanto cu e SDG’s, esta e Sustainable Development Goals cu Aruba a compromete cune. Y Director di Turismo Ronella Croes ta comprometi na un desaroyo turistico cu ta sostenibel.
Manera ta conoci, siman pasa Diabierna tabata Dia di Tera cu e tema ‘Inverti den Planeta.’ Di otro banda, pa Aruba por recupera di e sla di COVID-19, mester inverti den economia y te ainda e inversionnan ta den turismo.
“E vision integral di ATA, cu ta parti di maneho nacional, ta basa riba estudionan integral. Entre otro, e estudio riba e desaroyo di producto turistico ‘Cu Mira pa Futuro’ cu ta inclui accionnan integral. For di estudio a sali e peticion pa haci investigacion riba e capacidad di carga. Como tal, ATA a haci esey tambe. Y nos a haci e di tres estudio cu ta e ‘Niche Roadmap,’ esta cua ta e nichenan cu ta prudente pa desaroya, teniendo cuenta cu e beneficio economico pero tambe e balans entre economia, proteccion di naturalesa y beneficio pa comunidad. Cu esaki mi kier señala cu e maneho cu ATA ta conduci y unda ATA ta sinta na mesa, y por influencia e maneho nacional entre otro e ROP, e maneho economico y e master plan pa Aruba, tur ta sigui e liña cora aki di e estudionan aki cu ta basa riba un turismo duradero,” Croes a bisa Bon Dia Aruba.
Segun e Director di ATA, e ta un aspecto hopi importante pa tene na cuenta. Fuera di esey ATA ta na mesa como parti di diferente comision, unda ta purba influencia maneho, y no solamente den formulacion di maneho, pero hopi biaha pa sigura cu ta implementa e maneho. “Hopi biaha locual falta na Aruba ta percura cu ta sigui e maneho, esta implementacion (handhaving). Eynan tambe nos ta purba di influencia y guia di e manera corecto, teniendo cuenta. ATA ta haci esey como parti di nos papel, pues influencia maneho y su ehecucion y di otro banda nos ta facilita desaroyo pa medio di inverti den cierto proyecto. Por ehempel por pensa riba e inversion den siguridad na e zona turistico pa medio di e Aruba Hospitality and Security foundation, of e inversion den nos playanan, e awa di Aruba, trabounan cu ta haci pa beach limpi, e ponemento di bouys pero tambe e contribucion na e Aruba Excellence Foundation cu ta ofrece training na nivel di servicio. Pero tambe e proyecto di bari di sushi cu a lansa recientemente y tambe nos participacion den e desaroyo di San Nicolas. Ta ehempelnan con nos ta facilita pa medio di prioritisa proyectonan asina.”
E maneho di turismo nacional ta basa grandemente riba locual ATA ta fiha como liña. Gobierno ta formula maneho, pero e ta basa riba e contribucion di ATA. E ta enfoca hopi, y esey ta e vision di Gobierno tambe, riba desaroyo di producto turistico. E ta enfoca riba innovacion tambe cu ta necesario.
Desaroyo sostenibel
Ronella Croes a bisa cu ATA tin un papel pa hunga na momento cu ta construi hotelnan. E decision ta di Gobierno pero ATA a cana e trayecto di zonificacion di Aruba, prome cu e ROP a bira ley. Tabatin discusion hopi profundo cu a tuma luga cu diferente actor. “Nos a discuti hopi riba e tereno di acomodacion y nos a asumi e tarea ta mira con pa haci cu e lista cu tabatin di acomodacion bira menos. Esey tabata un di nos tareanan. Loke tin den e plan di zonificacion y cu ta ley awor aki ta un total di proyecto, cu algun ta den ehecucion awor, cu ta resultado di e proceso ey. Ta proyectonan cu legalmente tabatin opcion caba y no por a haci nada mas. Mi no ta bisa cu mi ta contra e proyectonan, pero ta djis pa pone den contexto. Fuera di esey, e ley di zonificacion ta papia di producto di calidad halto, y eynan ATA a traha tambe riba un maneho unda a defini criteria cu acomodacionnan mester cumpli cune. E ta inclui criteria con miho anda cu medio ambiente y desperdicio y otro.” Den otro palabra mester a defini kico ta un ‘hoogwaardig kwaliteits product’ (producto di calidad halto) cu ta un termino cu ta bin dilanti den e ley di zonificacion.
