Cu asombro ami a tuma nota di e postura arogante di algun ministro di e gobierno actual. Un postura anti democratico cu ta mina e libertad di expresion cu ta garantisa den nos Constitucion. Un politico ta na servicio di comunidad p’esey e actividad anti democratico ta robes ariba tantisimo nivel cu mi no sa mes unda pa cuminsa. Pero ban purba di señala un par di nan.
Nada nobo
Minister Rocco Tjon y minister Andy Croes ta actua manera loke ta nan ta haci ta un novum pero en realidad e no ta nada nobo. Nos tin granel di ehempel rond mundo.
Na China pa decada caba tur loke ta wordo publica mester di aprobacion di gobierno comunista Chines y tur cu ta opone e gobierno of tin ideologia cu ta contrario na esun di gobierno chines ta woro persigui, censura y/of encarcela.
Otro ehempel cerca di cas. Presidente Maduro a persigui y encarcela tur esnan cu ta opone su maneho. Canal di television a wordo cera of censura, periodista y oponentenan politico a wordo aresta y encarcela.
Un mas actual ta esun di Russia. Presidente Ruso Vladimir Putin a dicidi di ehecuta su plan di expansion invadiendo Oekraina. Pa evita reaccion den su pais Putin a traha un storia y a convence e poblacion specialmente e masa cu ta biba den areanan rural. Su exito ta depende di su control di loke medio di comunicacion ta publica (loke e pueblo ta haya pa wak y scucha).
Tapa iregularidad
Ta dificil pa haci cosnan cu no mag di wak luz di dia si constantemente prensa ta expone bo actonan. P’esey pa gobierno e ta di sumo importancia pa silencia prensa, ataca contrincante nan politica riba un nivel personal y baho. Pueblo no mag di sa cu e fiesta di Friends and Family ta sigui.
Hoogmoed
Nos minister actual ta mustrando nan arogancia y falta di humildad cu nan actuacion. Ta parce cu e gobernantenan actual y nan parlamentarionan di MEP/Raiz ta lubida cu nan t’ey pa sirbi e interes di e Pais Aruba. Ta minister kiermen cu bo ta un representante di pais cu ta encarga cu maneho di pais. Un minister igual cu un parlamentario ta un sirbido di e pueblo.
Hipocresia
Minister Rocco Tjon a declara cu tanten cu 24 Ora su nivel di periodismo no drecha e no ta duna ningun entrevista. Mi pregunta na minister Tjon: “E mesun standard ta aplicabel pe e medio di comunicacion di Santa Cruz cu toa pro MEP cu ta lustra y hasta menasa prensa?
Parlamentarionan ta yena nan boca cu e frase Parlamento ta e organo di mas halto den e Pais. Pero e realidad ta otro. Nos ta wak cu 11 Parlamentario ta permiti Ministernan haci y deshaci.
Minister Rocco ta actua manera un mucha mal cria cu no ta hayando su kier. Tur esaki mientras tin drive by shooting y yen di problemanan social. Minister Rocco ta scoge pa tapa wowo y purba gaña pueblo cu criminalidad y situacion social a mehora.
