Desde 1999 Fundacion Telefon pa Hubentud Aruba pa medio di su servicio ta duna informacion, opcion y sosten emocional na mucha y hoben di Aruba.
Pa haci esaki Fundacion Telefon pa Hubentud Aruba ta haci uzo di diferente instrumento manera: telefon, email, chat, website, charla, workshop y proyecto. Den 2021 pa medio di e instrumentonan aki tabatin 13.689 contacto cu Telefon pa Hubentud. E contactonan tawata di mucha, hoben, mayor y profesionalnan. E serviconan di Telefon pa Hubentud ta ser brinda di dialuna te cu diadomingo. E tres lunanan cu tabatin mas contacto cu e servicionan di Telefon pa Hubentud ta Juli cu 4002 contacto, september cu 2074 contacto y maart cu 1973 contacto.
E motibonan pa cual un persona por ta den contacto cu e servicio di Telefon pa Hubentud ta diferente. Algun di e temanan ta ‘Situacion na Cas’, ‘Violencia’, ‘Informacion’, ‘Comunicacion’, ‘Derecho di Mucha’ etc. Den 2021 tambe e muchanan, hobenan, mayornan y profesionalnan tawata den contacto cu Telefon pa Hubentud pa diferente motibo. E top 5 di e motibonan pa kiko a tuma contacto cu Telefon pa Hubentud den 2021 ta: Informacion (10.244 momento di contacto), Violencia (838 momento di contacto), Problema mental (655 momento di contacto), media social (401 momento di contacto) y Norma y Balor (274 momento di contacto).
Di 13.689 contactonan den 2021, 2355 tawata hende homber, 2888 tawata hende muher y di 8446 e sexo no tawata indentifica.
Den aña 2020 door di e Pandemia di Covid-19 mester a para diferente training cu tur aña ta wordo duna na e mentornan di Telefon pa Hubentud. Den aña 2021 a sigui cu tur e trainingnan. Asina aki den luna di mei 2021 a logra duna un grupo di persona e training basico di mentor y asina aki a amplia e cantidad di mentornan cu ta esnan cu ta duna e asistencia na telefon, email y chat. Banda di e training basico atrobe por a organisa ‘Deskundigheidsbevordering Dag’ ‘Ningun Grito den Silencio’.
E tema di ‘Deskundigheidsbevordering Dag’ tawata salud mental. Ariba e dia aki e training ser duna pa profesionalnan di Respaldo, Bureau Slachtofferhulp di Korps Politie Aruba en Psymia. ‘Reflectie Weekend’ cu tambe ta un di e training cu e mentor ta ricibi tur aña. Durante ‘Reflectie Weekend’ a concentra ariba e salud mental di e mentornan mes, pa asina aki nan por keda duna servicio di calidad na e muchanan, hobenan y adolescentenan di Aruba.
Banda di e mentornan, e personal di Fundacion Telefon pa Hubentud Aruba tambe a sigui diferente curso. Asina e personal a sigui COMBI (Communication for Behavioral Impact) training y Codigo di Proteccion.
Den 2021 como un ‘Kenniscentrum’ Fundacion Telefon pa Hubentud Aruba a exporta conocimiento na organisacionan gubernamental y no-gubernamental den region. Organisacionan na cual Fundacion Telefon pa Hubentud Aruba a comparti conocimento den 2021 ta Child Helpline International durante e CHI Regional Space 2021 ariba 17 di maart. Fundacion Telefon pa Hubentud Aruba por medio di su presidente a organisa e consulta y comparti conocimento. Tambe durante e ‘Regional Consultation of Child Helplines in the Americas and Caribbean’ ariba 24 y 25 di november 2021, Fundacion Telefon pa Hubentud Aruba a comparti informacion tocante e impacto di e Pandemia di Covid-19 ariba e salud mental ariba mucha, hoben y adolescente.
Durante ‘No Mas No More’ cu ta un conferencia cu ta trata e temanan di violencia contra hende muher, violencia domestico y derecho di mucha, y a tuma lugar na Bonaire di 29 di november pa 2 di december, Fundacion Telefon pa Hubentud Aruba a ser invita pa comparti conocimente tocante e best practices cu Telefon pa Hubentud ta uza pa asina aki duna servicio na e mucha, hobenan y adolescente na Aruba.
Tambe Fundacion Telefon pa Hubentud Aruba a presenta dos proyecto nobo den aña 2021. Ta trata di proyectonan Chic Chat y My Life My Chance. Pa medio di Chic Chat damanan di 14 te cu 17 aña ta bin den combersacion cu otro tocante temanan cu por ta un reto pa damanan di e edad aki. Chic Chat lo pasa na television y media social desde mei 2022. My Life My Chance ta un programa di television caminda 6 hoben ta duna un bista den nan bida, e disicionan cu nan a tuma y e resultado di esaki.
Un gradicimento ta bai na Setar N.V, Web Aruba N.V y Aruba Airport Authority N.V. pa e sosten den aña 2021 na e vision, mision y e trabaonan di Fundacion Telefon pa Hubentud Aruba.
Pa mas informacion tocante tur e trabaonan cu Fundacion Telefon pa Hubentud Aruba a desplega den aña 2021 pa nos muchanan, hobenan y adolescentenan di Aruba por tuma contacto cu Fundacion Telefon pa Hubentud Aruba via nos facebook: https://www.facebook.com/telefon.hubentud/, email: telhubentud@gmail.com of telefon 5886138/ 5884011.
