Ayera den oranan di mainta partido Red Democratico a convoca un conferencia di prensa pa asina nan trece dilanti e celebracion di dia 420 cu ta e Dia Internacional di Cannabis e cual ta wordo conmemora na diferente parti na mundo.

Di esaki, Ricardo Croes ex-parlamentario y miembro di partido a expresa su palabranan di felicitacion na esunnan cu di algun of otro forma ta relaciona cu e legalisacion, descriminalisacion y e respet pa e derechonan fundamental cu tin relacion cu cannabis.

El a señala cu dia 420 na diferente paisnan rond di mundo ta un dia di celebracion cu no ta discrimina unda cu hues, hurista, abogado,dokter, comerciante, entre otro, ta celebra cannabis di un manera of otro, “hermana isla Corsou ta den proceso di legalisacion, Boneiro no tin mester ni di pasa e proceso aki, Sint Marteen ta den proceso di legalisacion, entre otro islanan den Caribe y Aruba cu tabata un di e prome te ainda no a ni descriminalisa ” el a bisa.

Den un conferencia di prensa cu a tuma luga dilanti Corte el a menciona cu nan a scoge e luga aki pa motibo cu na Aruba esunnan cu ta na fabor di legalisacion no ta wordo mira como comerciante of un bon trahado sino cu al contrario, nan ta wordo señala, nan ta wordo castiga despues di un Drug Test y someti na stigmatisacion di personanan “non grata na e pais pasobra bo ta comete acto criminal door di consumi,cultiva of bende cannabis”, Croes a señala.

Pa e motibo aki, nan ta pidi gobierno pa considera esaki y “descriminalisa cannabis mesora” pa tur agricultor y bendedo di cannabis of esunnan cu ta haci uso di dje di cualkier forma pa wordo respeta y protegi igualmente cu tur ciudadano riba e pais aki, “e no ta aceptabel e abuso cu te ainda den reino Hulandes,na Aruba, ta tumando luga riba e tema di cannabis”, Croes a bisa.

El a trece dilanti cu gobierno, di e cual nan tabata forma parti di dje tabata considera e legalisacion di cannabis medicinal y e ta puntra, dicon te awor nada a tuma luga? Unda el a contesta pa su mes cu esaki tabata un wega y trampa politico cu a wordo prepara pa partido RED Democratico.

Debi na esey, nan a bin dilanti pa recorda pueblo cu “nos no ta entrega e bataya aki, nos ta kere den e forsa economico, nos ta kere den e forsa medicinal, den e respet pa derechonan fundamental, den e reparticion por igual di e recursonan limita di nos pais sin discriminacion”, el a finalisa.

“Bo ta usa placa di pueblo pa sigui kibra ley”

Di su parti, Armando Rudy Lampe, ex-minister di Enseñansa y tambe miembro di e partido aki a declara cu “e berdad, a perde un bataya pero nos no a perde e guera pa legalisacion di cannabis” y pa e motibo ey nan ta sigui den e lucha aki y nan ta considera esey como husticia cu na rond di mundo cuminsando pa respeta e derecho di consumidor te na loke ta e creacion di industria, un pilar economico nobo cu segun Lampe a expresa, ta necesario pa Aruba desaroya riba industria di cannabis.

Di mesun manera, el a indica cu tin un situacion preocupante pa motibo cu prome minister Evelyn Wever-Croes den pleno Semana Santa a bolbe viola estado di derecho unda cu den dianan ey el a bisa cu problema di werksternan di SKOA ta simplemente un discusion administrativo tin entre SKOA y Gobierno di Aruba, den su opinion, Lampe ta bisa cu esaki ta un mentira y cu no ta un discusion administrativo y loke tin ta sentencia di dos diferente hues cu a sentencia SKOA pa motibo cu “nan a kibra ley y e unico solucion ta respeta nos ley y respeta nos estado di derecho”, el a enfatisa.

El a sigui splica cu e problema no ta cu werksternan lo perde nan trabou sino e respet pa estado di derecho na unda tin cu cumpli cu loke dos hues a señala y cu aworaki nan ta destina recursonan financiero manera minister actual di Enseñansa Endy Croes a informa den su ultimo conferencia di prensa caminda el a bisa cu nan a pone 1 miyon florin extra pa e situacion aki.

“Cada aña bo tin cu tapa e ilegalidad aki cu e miyones ey pasobra e no ta un solucion structural sin ni un base legal, kiermen bo ta usa placa di pueblo pa sigui kibra ley y esey ta e gravedad di e asunto aki”, Lampe a declara.

Asina mes, el a bisa cu for di 2018 el a wordo avisa door di Financien cu el a surpasa e presupuesto cu 3 miyon florin unda cu el a indica cu e esey no por a sucede pa motibo cu e tabata considera su mes un minister responsabel cu placa di pueblo y e ora ey nan a bay investiga kico tabata pasando.

Di esaki el a bisa cu nan a descubri cu “tras di lomba di tur hende SKOA tabata declara e werksternan den sistema di paga di salario di personal di gobierno como si fuera nan ta ambtenaar y e ora ey nos a pidi minister di Finansas pa duna instruccion na director di Directie Financien pa para esey, no a sucede, e ora ey SKOA a hiba nos Corte pasobra nan ta hayando subsidio demas, contra ley” el a sigura.

SKOA a perde e caso aki dos biaha, prome cu eleccion di aña 2021 na unda cu Lampe a señala cu na e momento cu el a cuminsa kita loke nan a haya demas, nan a bay Corte y nan a perde.