Señora Xiomara Croes-Williams y señor Christopher Lake riba diaranson 13 di april 2022 a huramenta como miembro nobo di Algemene Rekenkamer Aruba (ARA) den presencia di Gobernador di Aruba, S.E. Alfonso Boekhoudt.
E huramentacion a tuma luga na Cas Ceremonial di Gobernador. Pa e ocasion aki Minister-President Evelyna Wever-Croes, señor Rick Samuels (presidente suplente di ARA), señora Mary Ann de Jong-Curet (secretaria di ARA) y señor Ricardo Croes, esposo di señora Croes-Williams, tambe tabata presente.
Prome Minister Evelyn Wever-Croes a comenta bisando cu “Fortifica e colegionan halto di estado ta un prioridad”.
“Contraloria General, ARA (Algemene Rekenkamer) awo ta completo atrobe”, Wever-Croes a comenta den un comunicado di prensa.
Prome Minister Evelyn Wever-Croes a enfatisa cu pa Gabinete Wever-Croes, fortifica e colegionan halto di estado ta un prioridad. Percura pa tin miembronan pa fortifica esakinan pa nan ta fuerte y independiente pa nan haci nan trabou. Awo lo sigui traha pa independisa e procesonan mas tanto posibel pa garantisa check and balances. Asina ta garantisa un fundeshi democratico firme den nos pais.
Den nomber di Gobierno di Aruba, Prome Minister ta gradici Parlamento di Aruba y ta felicita Contraloria General y ta desea señora Croes-Williams y señor Lake hopi exito den e funcion aki.
Potret © Kabinet Gouverneur Aruba.
