Den fin di siman lo tin presentacion di e concierto titula “Tropical” den Cas di Cultura. E concierto aki ta un iniciativa di dos hoben musico, Stephen Diaz y Denzil Tromp, cu tin como meta crea un plataforma pa otro musiconan hoben tambe expresa y demostra nan talentonan musical.

Diaz un di e hobennan musico a conta durante e conferencia di prensa cu nan ta hopi contento cu nan a yega e fase di ehecuta e proyecto aki despues cu nan tabatin basta luna trahando riba dje cu hopi esfuerso.

El a splica cu e idea ta un iniciativa di un concierto, pero no solamente pa toca musica si no pa crea un plataforma caminda cu nan por inspira otro hobennan manera nan mes cu ta den e area di musica pa sigui nan talento y pa nan tin un plataforma pa expresa y desaroya.

E hoben a indica cu ya caba nan a yega di haci un concierto musical den colaboracion cu Cas di Cultura, cual tabata dos aña pasa, y aworaki atrobe nan a haya e oportunidad pa hacie y pa e biaha aki nan kier a haci na nivel mas halto. “Nos ta hacie un tiki mas upscale, un produccion un tiki mas grandi y nos a crea un ekipo cu un compania di marketing y diferente compania di produccion y nos dicidi di haciele un produccion di nivel mas halto”, el a splica.

Segun Diaz e idea di e concierto ta manera e nomber mes ta bisa e musica cu lo wordo toca ta musica tropical, musica di e region. Su mes, hunto cu su compañero Denzil Tromp, como musico lo toca den e concierto, pero nan lo host e evento tambe. El a menciona cu nan a crea un banda musical relativamente grandi cu musiconan cu tin trayectoria den mundo di musica caba.

“E idea di esaki ta cu nos cu ta cuminsando nos carera nos kier a crea un banda cu personanan cu experiencia cu lo por guia nos den ehecuta e concierto aki na un nivel halto. Nos ta den proceso di ultimo siman di preparacion den ensayonan pa cu e evento”, Diaz a agrega.

El a remarca cu nan tabata busca tur manera con pa haci algo cu pa nan lo tin hopi significado, pero cu lo inspira otro hobennan tambe. E concierto Tropical lo ta diasabra 16 di april den Cas di Cultura y segun Diaz a menciona, despues di e concierto lo tin un after party na Cuba’s Cooking. E idea di e after party, el a splica, no ta simplemente pa tin otro evento, pero pa crea un ambiente caminda e publico por interactua cu e musico- y artistanan.

E compañero di Diaz, Denzil Tromp, a enfatisa tambe cu e iniciativa di e concierto ta cu e ta un plataforma cu e hobennan ta purbando di crea no solamente pa toca, pero pa expresa tambe e parti artistico di musica.

Tromp a splica cu e lo ta un concierto diverso unda cu lo bay tin un parti caminda artistanan lo subi ariba stage pa canta cierto canticanan y despues lo tin e parti instrumental caminda nan mes lo ta tocando y e parti aki lo enfoca un poco mas ariba e genero di jazz.

Tromp a menciona tambe cu e banda musical pa e anochi aki ta consisti di 11 miembro cu musiconan manera, Ivan Quandus, Segio Jansen, Kyle Winterdaal, Christopher Rudolfo, Franklin Granadillo, Jair “Buddy” Versprey, entre otro.

Robert Maduro di Departamento di Cultura Aruba (DCA) a expresa cu pa DCA e ta e ta un placer pa por anuncia un proyecto cu ta un iniciativa di dos hoben musico cu ta yuda engrandece e cultura y arte di Aruba.

“E hobennan aki no ta solamente musico, nan ta studiante ainda di musica. Nan ta busca fronteranan nobo y esaki ta un parti inspirador pasobra ta un frontera cu mester wordo descubri”, el a remarca.

El a enfatisa cu DCA ta aprecia e tipo di iniciativanan asina ‘ki, tipo di proyectonan asina y p’esey nan ta apoya e hobennan pa asina por tin un desaroyo den cultura, mas ainda si e ta sali for di hobennan mes. Maduro a menciona tambe cu via iniciativanan asina nan por yega na otro grupo di hobennan cu nan lo desea pa tambe ta mas activo den arte y cultura di Aruba.

“Cultura no ta solamente musica, cultura tin diferente parti di dje, nos ta papia di baile, di pintamento, actuacion, obranan di man, escultornan, nos ta papia di diferente tipo di disciplina cu tin den cultura, y caminda nos por gara un hoben cu ta interesa, capta su atencion, nos ta interesa pa e tambe contribui na cultura positivamente, mi ta kere e mensahe ta cu nos ta kita un hoben for di caya y for di mal caminda”, el a agrega.

Na final Maduro a subraya cu DCA ta habri semper pa duna oportunidad na e hobennan pa descubri fronteranan nobo y fusionnan diferente, y alabes tambe lanta interes den e otro hobennan cu lo mira e concierto aki pa asina nan tambe por participa na cualkier otro disciplina di arte.