Ministernan di Salud y Deporte, Asuntonan Economico, Desaroyo Sostenibel y Comunicacion ademas di Serlimar, SVB y AZV tur a haya peticion pa informacion specifico riba efecto di dump riba salud di hende. E peticionnan pa informacion ta di activista mr. Anouk Balentina, basa riba e Ley Openbaarheid van Bestuur, LOB. Ta trata di e ley cu ta mara Gobierno y instancianan publico di duna informacion na ciudadanonan. E cinco peticion a base di LOB a keda entrega e siman aki.

Den e cartanan, mr. Balentina, kende no solamente ta un activista contra e dump di Parkietenbos, pero ta un hurista cu hopi experiencia y tambe un asina yama ‘ervaringsdeskundige.’ Den otro palabra, e ta experiencia efectonan di dump riba su propio salud y esun di su yiunan. Den su cartanan, mr. Balentina a skirbi cu “ mi yiunan y ami ta continuamente malo y e ta probablemente causa pa emisionnan di e sushedad na Parkietenbos.”

Mr. Balentina ta bisa cu e ta busca informacion basa riba e derecho di tur ciudadano pa por haya acceso na informacion ora cu salud publico y situacion ambiental peligroso ta den wega. Den e caso aki ta papia di e efectonan causa pa dump na Parkietenbos. E derechonan aki ta hancra den articulonan 2, 8 y 10 di e Tratado di Derechonan Humano Europeo, EVRM y tambe hurisprudencia di Corte Europeo pa Derechonan Humano, EHRM, na Straatsburg.

E peticionnan ta basa riba e rapport di Organisacion Pan Americano di Salud, PAHO, di 2018, titula ‘Evaluacion del manejo de residuos solidos urbanos y comerciales en Aruba’ y e rapport Carmabi 2020 ‘Coral Reefs Baseline Study for Aruba 2019.’ Ambos rapport ta indica cu efectonan di tiramento di sushi y e landfill mes ta yega hopi leu.

Serlimar

Balentina a pidi Serlimar cu ta e entidad responsabel cu maneho di e dump na Parkietenbos pa duna e cantidad di caso y detayenan medico di e ultimo 10 añanan relaciona cu personal di Serlimar, tanto esnan den servicio fiho y esnan cu contract cu a haci trabou riba dump. E datonan aki mester bin sin nomber ni adres pa asina proteha e privacidad di personanan. Locual tambe kier sa ta e periodo total cu e personanan ta of tabata den servicio, y si ta posibel, e kier dato di e motibonan di malesa y e cantidad di personal di Serlimar cu a fayece. Mescos cu e ta sufri bou efectonan di e dump, Balentina ta convenci cu personal di Serlimar cu ta traha riba dump tambe ta confronta problema cu salud.

Ministernan Wever y Oduber

Den su peticion pa Minister Geoffrey Wever, Anouk Balentina a informa cu tabata riba 23 di Januari 2020, cu Minister di Salud y Deporte Dangui Oduber a bisa cu ta bay investiga e efectonan pa salud di habitantenan di e area di Parkietenbos. “Nos ta dos aña mas ley ,pero no a presenta e resultado. Ya cu Minister Wever ta encarga cu e acumulacion, procesamento y publicacion di datonan estadistico (red. Bureau Central di Estadistica, CBS), ta pidi informacion cuantitativo y cualitativo basa riba e LOB.

Aki kier datonan di cifranan y estadistica riba: e total di casonan y detayenan medico di e ultimo 10 añanan, di tanto adulto y mucha cu ta biba denter di un distancia linear di 950 meter for di dump of cu a biba den e bario di Simeon Antonio pa e ultimo 10 añanan. Pa por haci un cuadro di referencia, kier datonan similar di un of mas bario cu no ta cay bou di e influencia di efectonan di dump, por ehempel Malmok.

Mescos cu ta e caso cu e personal di Serlimar, Balentina solamente kier e cantidad y casonan medico, sin ningun nomber y adres.

Tambe e ta puntra pa CBS por duna e cantidad di caso di cancer den e ultimo 10 añanan, parti den e tipo di cancer. Por ehempel, e malesa canceroso Sarcoma, specifica den ‘Soft Tissue Sarcoma,’ Dermatofibrosarcoma Protuberans y lymphoma, specifica na Non-Hodgkins, cancer di pulmon y ‘long adenocarcinoma.’

Tambe Balentina kier sa cuanto ta e cantidad di medicamento cu a duna pa tur e malesanan aki, y specifica na e sorto, y e gastonan cu AZV mester carga basa riba specialismo (e tipo di malesa) y e medicamento pa e malesanan specifico.

Otro dato importante pa haya un bista riba e condicion di salud causa pa e dump ta e cantidad di malesa cronico y ki tipo di malesa cronico tin den e grupo specifico. Mescos ta trata e cantidad di morto y kico tabata e causa. E peticion ta inclui pa duna descripcion di e cuadro clinico y e cantidad cu por keda cualifica por ehempel na problema cu cuero, manera psiorasis, exzema, pero tambe kehonan di wowo, garganta, nanishi, alergia, asma, COPD, Autismo, depresion, problema di curason y malesa di autoinmunidad, tanto cerca adultonan como mucha. Tambe e kier sa cua ta e periodo total cu personanan cu tur e kehonan aki ta of a biba den e area cu ta keda cerca di dump di Parkietenbos.

AZV y SVB

E informacion cu a pidi ta inclui dato riba cantidad di keho, ‘ziektemelding’ den e banco di data di AZV cu ta drenta via Hospital y IMSAN of otro.

E peticion basa riba LOB cu a bay pa Minister di Salud Sr. Dangui Oduber, mescos cu e peticionnan pa informacion pa SVB y AZV ta inclui e preguntanan aki y ta similar na otro.

Ta unicamente cu e datonan aki por haya un miho bista di e peso di dump riba calidad di bida, salud di hende, pa no papia mes e gasto financiero cu AZV mester carga, Anouk Balentina a bisa Bon Dia Aruba. E ta spera cu ta reconoce su derechonan pa haci e preguntanan aki y cu e por haya e contestanan mas pronto cu ta posibel. E peticion pa e informacion aki ta los di e accion legal cu mr. Balentina kier pa Ministerio Publico tuma pa para ilegalidad na Parkietenbos, cu segun e propio Procurador General Bote ter Steege, mester keda soluciona pa fin di 2022.