Sindicato AVB y hospital ta firma CAO protocol pa 2022

Ayera tardi a tuma luga durante un conferencia di prensa e firmamento di protocol pa un CAO entre Dr. Horacio Oduber Hospital y sindicato di hospital ABV. Despues di basta tempo di mal contento entre e trahadonan y di un negociacion intenso entre e partidonan envolvi, a logra yega na un acuerdo pa firma e protocol nobo pa e CAO pa aña 2022.

Gregory Croeze miembro di directiva di hospital y di laboratorio a splica cu e negociacionnan cu a tuma luga a cuminsa for di fin di aña 2021. E negociacion tabata basta intenso y caminda tur siman e ekipo di hospital hunto cu ABV tabata sinta na mesa pa delibera kico ta e recortenan cu nan a haya riba nan presupuesto pa 2022 ta nifica y pa alabes yega na puntonan caminda ambos partido ta di acuerdo ariba kico si y kico no por pa e aña aki.

“Mi kier a yama danki na e ekipo cu a yuda nos y tambe mi kier a yama danki na sindicato. Mi sa cu negociacionnan no tabata facil y nos no ta sinta ‘kinan pa celebra tampoco. Nos a dicidi di firma pa un aña pasobra esaki ta e aña cu nos por premira mas o menos kico lo por pasa den hospital”, Croeze a remarca.

Presidente di sindicato ABV, Gina Maduro a indica cu desde aña pasa october sindicato ABV a cuminsa cu un negociacion di un CAO pa e empleado- y miembronan di hospital, FSLMA y Bloedbank.

Maduro tambe a enfatisa cu e periodo di negociacion tabata dificil y pa prome biaha den historia sindicato ABV tin cu negosha un CAO cu no ta na e forma tradicional pa motibo cu esaki tin di haber cu e recorte di 5.5% y na unda cu e partidonan a trata di wak con nan por yega na un acuerdo mientras tabata en espera di e desaroyonan andando.

Segun el a sigui splica, ABV a warda comienso di aña pa wak si e recorte di 5.5% lo sigui pa 2022, cu ta locual a hiba na versobering di e CAO. “Pa nos e no ta un momento usual cu nos tin den negociacion di CAO, pero mi tin cu bisa cu e dos partidonan na mesa a mustra nan grandesa y unda cu a yega toch na un acuerdo”, Maduro a agrega.

El a subraya cu lo bay haci recortenan den momentonan “cu e por haci menos dolor na tur hende”, pero di otro banda, segun el a menciona, ABV ta contento cu locual a acorda pasobra aña pasa nan vries e prima di pensioen y e aña aki nan a recupera e parti cu nan a vries na 2021 pa 2022.

Esaki ta un proceso largo cu ABV tabata pusha pe, Maduro a remarca, y el a bisa cu pa 2022 porfin trahadonan di hospital a yega 15%, “esey si nos ta hopi contento cu e parti aki, pero ta algo cu nos a traha riba dje 11 aña largo”, el a bisa. “Mi tambe ta gradici e ekipo completo di hospital, e ekipo di CAO. Mi ta kere nos a mustra nos grandesa y na unda cu nos por a yega na otro cu nos por a protocol di un aña”.

Pa loke ta trata e diferencianan mas grandi cu tin den e protocol nobo aki, Maduro a splica cu nan a tuma entre otro decisionnan indicando kico por entrega y kico no. El a bisa cu den e parti aki aña pasa 2021 tanto dunado di trabao como trahado a scoge pa vries e prima di pensioen pa un aña y pa motibo cu nan a haci e escogencia pa 2021, pa 2022 nan ta recuper’e back.

Apart di e cambio den e parti di pensioen, el a señala cu otro cambio den e protocol ta cu pa e aña aki no lo tin aumento di salario. Tur trahado di hospital, FSLMA y Bloedbank no ta bay conoce un aumento di salario directo pa 2022.

Otro articulonan tambe cu a conoce cambio ta tocante orario di trabao flexibel y tambe e parti di december na unda e suma cu tabatin poni den e otro CAO a baha, esaki bira 350, pero cu e intencion pa bin cu desempeño anual.

Maduro a enfatisa cu pa motibo cu e protocol aki ta un versobering di e CAO anterior y door di e recorte di 5.5% y inseguridad ta dificil pa cera un CAO mas largo. Pa e motibo aki e ta un termino di un aña so.

Como sindicato ABV, e presidente di e sindicato a indica, cu nan lo busca tur manera pa nan haya un afspraak cu e secretaria di estado, Alexandra van Huffelen, cu ta bay bin pronto Aruba. El a recorda cu aña pasa e sindicato no a haya oportunidad di cera conoci cune, pero e biaha aki sigur ABV lo kier un reunion cu su persona pa introduci nan mes y alabes vocifera nan mes como sindicato den cuido y tambe vocifera kico e recorte di e 60 miyon y e 5.5% aki ta causando.

“E pregunta cu ABV ta keda haci cu niun hende no por duna contesta, dicon 60 miyon ta wordo corta den cuido? Dicon no 30 miyon? Y tambe e otro pregunta, dicon landsbijdrage ta 0%, no tin nada hinca den presupuesto di pais Aruba. Esey ta keda nos pregunta y preocupacion”, Maduro a expresa.

Director di hospital, Jacco Vroegop, tambe a expresa su gradicimento na tur empleado cu a acepta e protocol nobo aki. El a enfatisa cu den e temponan dificil aki tur hende mester duna algo y esey ta algo cu cada biaha mas dificil pa motibo di e inflacion na e isla, tur demas problemanan y e recortenan cu tin den e sector di cuido cu ta obliga nan haci esey.

“Esaki ta algo cu basicamente nos mester haci pero cu no ta sinti bon. Sinembargo nos a asumi e responsabilidad aki cu hunto nos por sigui brinda bon cuido pa e habitantenan di Aruba. Un danki na henter personal cu a bay di acuerdo cu e protocol aki y manera Gina a bisa e ta un versobering y no algo di celebra”, e director a remarca.