Holo di pisca putri a core cu local y turista for di waf y area y a pesar cu Fundacion Rancho a pidi asistencia, awe ta spera di por haya ayudo di Buro City Inspector. Segun Clifford Rosa di Fundacion Rancho, a topa cu un situacion totalmente antihigienico y mahos na e beach patras di unda e markthalllen ta. Un cantidad di resto di pisca, for di cabez, mondongo y otro cu lama a trece tera. Y nan no a bin di leu.
Personanan sin consenshi a dicidi pa haci pisca limpi riba e pier chikito cu piscadonan ta usa y a simplemente tira tur e resto den lama. Piscadonan experiencia cu regularmente ta haci uso di e pier chikito no ta haci esaki, segun Sr. Rosa. Es mas, tabata un piscado di Waf di Rancho cu a informa sr. Rosa di e situacion kende a dicidi pa bay wak su mes y a topa cu un beach yena cu resto di pisca daña, cu tabata manda holo masha stinki mes. Turistanan tabata keha pa e condicion di un area cu normalmente ta hopi popular pa esnan cu ta bishita Playa.
Aunke cu no sa ken por a haci e acto aki, e por ta un persona cu ta bende pisca of un restaurant cu a cumpra pisca y a laga haci nan limpi na e sitio mes. En todo caso, e situacion tabata uno hopi mahos y antihigienico. “Turistanan tabata saca potret y cana bay mesora,” Clifford Rosa a bisa Bon Dia Aruba.
E mes a yama oficina di Parke Marino ya cu e area ta cay bou nan maneho, pero no a haya reaccion. El a tuma contacto cu Bureau City Inspector cu a laga sa cu no por atende cu e caso ya cu tabatin otro actividad planea caba, esta pa atende cu problematica di cacho. Riba e pregunta si e condominio den cercania por tin video pa mustra ken a tira e resto di pisca den lama asina cerca di waf, e contesta tabata: “Nos a haci locual nos por.” Sr. Rosa no tin e autoridad cu polis tin por ehempel pa medio di e Algemene Politie Verordening pa pidi pa wak e videonan.
Consecuentemente, ta di djis warda pa awe mira con ta kita locual lama a benta riba canto y spera cu no tin mas resto di pisca laba bin, pa asina e problema no bira mas grandi. “Locual a yega na tera ta di e dia prome y ainda tin ta drif rond di e pier mes. Den fondo di lama tin masha hopi,” un Clifford Rosa desapunta a bisa Bon Dia Aruba.
