E reciente cambionan di ley cu a tuma luga relaciona cu impuesto di vehiculo di motor no a mishi cu e prijsnan. Tabata tin un discrepancia tambe den esaki en cuanto ta prijsnan di impuesto di vehiculonan manera takelwagen y truck. Esaki segun vocero di Servicio di Impuesto Aruba (SIA) ta algo cu ta asina den ley anto no por mishi cu ne.
Berdad ta asina cu por ehempel un truck di diesel ta paga 1850 florin pa aña, pero un tracker ta paga 900 florin. Esaki ta algo cu chauffeurnan di e vehiculonan aki tambe tabata poco preocupa cu ne.”E ta berdad cu ta un discrepancia pero nos no por haci nada cu esey pasobra asina eynan e ta poni den ley”, vocero Meverly Romano ta comenta. Siman pasa dialuna algun chauffeur di truck a lanta un accion di protesta y entrega un manifiesto na gobierno. Cu esaki nan a exigi pa gobierno traha riba e careteranan kibra y pa flexibilisa pago di impuesto riba vehiculo di motor. Specificamente pa por paga esaki den cuater pago.
Areglo di pago
Segun sra. Romano, despues di e manifestacion aki definitivamente el a haya oido cerca minister di Financia. “Minister a pidi epartamento di impuesto pa bin cu un plan di maneho general y esey ta loke nos ta haciendo aworaki.” E intencion ta pa bay presenta esaki na minister anto despues di aprobacion pa pone e clientenan na altura riba e decisionnan a base di e plan di maneho aki.
Tur esaki ta di tuma luga e siman aki segun departamento di impuesto ta informa. E ta algo cu lo ta basa riba e flexibilidad cu minister a pidi como tambe seguramente e suplica di e clientenan. “Esaki ta pues: kico ta e condicionnan, ki ora bo ta haya of ta bin na remarca na un areglo di pago etc. Mi no por duna mucho detaye riba esey pasobra actualmente nos ta trahando riba dje.” Den un areglo di pago manera nos conoce den otro tipo di impuesto, e cliente mester mustra cu nan no tin otro manera pa pag’e. Pero segun sra. Romano den e caso aki “esaki ta un belasting particular.” Gerencia di departamento di impuesto mester delinea exactamente ta kico esaki ta bay bira den un maneho nobo.
Chauffeurnan no a tende nada ainda riba e desaroyo despues di nan accion pero ta positivo cu e ta bay ta bon. E grupo di chauffeur cu a manifesta siman pasa ta keda urgi pa por paga den cuater pago anto e siguiente dos pago manera tur A- wagen.
