(DiarioLibre) – Presidente Luis Abinader a sigura diasabra cu e gobierno ta purba mitiga e prijsnan halto di cuminda, a pesar di e impacto provoca pa e pandemia di COVID-19 y di e guera entre Rusia y Ucrania, situacionnan cu a genera crisis na Republica Dominicana.
E mandatario a indica cu e programanan social di gobierno ta mas grandi cu antes, den tur manera, locual agrega na otro medidanan ta contribui na e prijsnan halto internacional y hiba cuminda mas barata na e poblacion.
El a delanta cu e ayudonan lo continua, ya cu hopi persona tin mester di dje mirando e panorama internacional di aumento di prijsnan, sobre todo e aumento di e materia prima.
“Nos ta preocupando nos mes pa mitiga e aumentonan aki di prijsnan internacional”, e gobernante a bisa durante un supervision na e mercado di productornan di e Instituto de Estabilizacion de Precios (Inespre).
E hefe di Estado a cita entre e medidanan tuma pa e gobierno pa contribui cu e aumentonan externo lo impacta lo menos posibel e poblacion, e benta di prijsnan special di Inespre, subsidio na productornan y un ayudo directo na esnan cu mas tin mester di dje.
E director di Inespre, Ivan Hernandez Guzman, a informa cu e institucion ta mantene 73 mercado di productornan y 240 bodeganan mobil pa siman, como tambe benta special na 250 supermercado.
Relaciona cu e postura di sectornan di oposicion ken ta opone na e impuesto cero na mas di 60 producto cu ta compone e basket basico, presidente Abinader a bisa cu nan tambe antes tabata di acuerdo cu e medida aki.
“Nan antes tabata di acuerdo y aworaki nan no ta di acuerdo, loke nos kier ta hiba cuminda mas barata pa e pueblo, nan por ta contra pero nos ta tumando medidanan den circunstancianan hopi dificil pa cuminda mas barata yega tur caminda”, e mandatario a bisa.
