Ayera Andreina Morillo, periodista y miembro de Sociedad Interamericano de Prensa, a manda un carta na Gobernador di Aruba y Hulanda den protesta contra ministernan Rocco Tjon y Glenbert Croes, cu segun Morillo, ta ‘censura medionan di prensa’.

Link pa e carta completo: https://docs.google.com/document/d/1ADi9VQQwa0unOjm5Jaa7yMhgmFax3jaXCi9Q1aPSlGM/edit?usp=sharing

Morillo a skirbi cu, sabiendo cu ‘hopi hende lo reacciona, e carta ta na Spaño pasobra esey ta idioma cu mi ta expresa mi mes miho’. El a destaca cu “articulo 1.1 di Constitucion di Aruba ta duna mi libertad pa mi por expresa mi mes den mi idioma, sin cu mi tin cu wordo discrimina.”

Morillo ta destaca cu e derechonan cu e ministernan en cuestion ta limitando, pa cual el a entrega su carta, “ta e mesun derechonan cu nan ta bay tin mester ora nan lo ta den oposicion back. Esaki no ta conta solamente pa partidonan politico, e ta conta tambe pa miembronan di prensa.”

Den su carta, Morillo ta destaca:
“Acceso na informacion ta importante den un sociedad democratico, cada persona mester tin autonomia y tin mester di esaki pa tuma su decisionnan libremente. Den derecho constitucional di Aruba, na e derecho na informacion ta consagra un proteccion adicional cu ta faborece libertad, compilacion di informacion y di expresion, cual t’ey cu meta di reglamenta esaki pa asina pueblo por dicidi si ta di acuerdo cu e caminda riba cual e pais ta bayendo, ya cu di otro manera no por dicidi obhetivamente, y pa e motibo aki e libertad di expresion y di informacion ta importante.”

Teniendo cuenta cu esaki, Morillo ta expresa preocupacion pa e incidente dia 3 di maart ultimo den cual minister di Husticia y Asunto Social, Rocco Tjon, a nenga di contesta un pregunta di periodista Marco Espinoza, bisando cu e pregunta tabatin meta politico.
Ademas, e ta haci referencia na e situacion dia 15 di maart ultimo den cual minister di Energia, Labor y Integracion, Glenbert Croes a uni na e iniciativa di minister Tjon durante otro conferencia di prensa, pa kibra e laso di comunicacion cu 24ora.

Morillo ta lamenta cu e incidentenan menciona a empeora un situacion cu ta aumenta desinformacion y trato hostil contra cierto periodista, usando lenguahe agresivo cu segun Morillo, ‘ta sobrepasa e limitenan di derecho na informacion y derecho na prensa liber’.

Por lesa e carta den su totalidad riba nos webiste, bondia.com.