Docentenan di scol ta bati alarma riba e peligroso wega online di Huggy Wuggy

Nabega den internet ta un di e cosnan mas comun cu ta wordo haci den tempo aki, specialmente pa e muchanan cu pa hopi biaha nan ta parce mas experto cu e mesun adultonan, sinembargo, aunke mayornan sa cu muchanan ta capaz di tur cos, tambe ta bon pa mayornan sa kico nan yiunan ta busca y mira riba internet.

Poppy Playtime ta un video wega di teror y supervivencia desaroya y publica pa e compania MOB Games, e hungado ta wega como un ex-trahado cu ta bishita un fabrica di coy di hunga bandona, den e wega e prome hungado ta capaz di resolve algun misterio.

Huggy Wuggy ta e personahe protagonista di Poppy Playtime cu a gana popularidad entre muchanan y cu recientemente personanan den comunidad y docentenan di scol ta batiendo alarma riba e historia berdadero di e personahe aki ya cu e ta menasa cu lo mata esunnan cu ta hunga e wega.

Specialistanan ta sugeri pa crea perfil pa muchanan riba Youtube y asina ey por segmenta e videonan cu nan ta wak. Di e forma aki, mayornan por compaña nan yiu den e mundo digital y evita miedo y posibel traumanan.

E historia di Huggy Wuggy ta mustra un popchi blauw cu tin djentenan blanco largo como un personahe inocente den Poppy Playtime, e video wega, na medida cu e hungado ta avansa den actividadnan virtual, e obhetivo mes ta bira den e intento di scapa di e garanan di Huggy Wuggy, ken ta wordo mustra como un monster maligno.

Aunke e video wega ta destina y ta wordo hunga pa adolescentenan, e imagennan di e popchi a bay viral y ta parce den algun app cu ta wordo usa pa muchanan como Tik Tok y Youtube. Esaki a haci cu e wega Huggy Wuggy a transcende den e recreacion virtual y a wordo popularisa entre e muchanan cu awor ta pidi e wega aki.

E problema no ta su popularidad sino cu tanto den videonan como weganan, e popchi ta menasa cu duna un brasa hasta laga sin rosea na esunnan cu ta mira e video. Ademas algun escena a bay viral na unda por wak cu e ta haciendo algun accionnan violento cu no ta adecua pa e edad di e muchanan.

E popchi aki a wordo popularisa di un manera asina lihe cu den ultimo Pasco el a wordo bendi den tur tienda di co’i hunga y e ofertanan riba website pa cumpr’e a crece, for di 900 te 4.000 dollar ta e balor cu e cual el a wordo bendi, segun e caracteristicanan cu e ta presenta.

Na comienso di aña, varios medionan di comunicacion na nivel internacional a haci investigacionnan y nan a yega na e conclusion cu e coy di hunga aki ta “un tendencia di moda” entre muchanan di 8 pa 9 aña, di mesun manera tambe ta aparece Kissy Missy, e compañera di e personahe blauw aki.

Ta p’esey cu mayornan mester cuminsa limita e contenido cu muchanan ta wak riba diferente app, como Youtube cu ta e app di videonan mas importante na mundo cu a logra di ta un di e pilarnan di entretenimento pa esunnan mas hoben, pa e motibo aki, ta hopi importante pa siña con pa administra e app aki.

Specialistanan den seguridad cibernetico ta indica cu ta existi cierto regulacion cu por realisa pa minimalisa e riesgonan cu e muchanan por tin riba internet, e wega aki ‘Poppy Playtime’ no tin clasificacion pa edadnan y specialistanan ta recomenda cu e wega aki ta contene elementonan cu no ta considera sigur pa muchanan, como por ehemplo, ta utilisa personanan amigabel pa muchanan como coy hunga y despues ta haci nan bira un menasa.

Debi na e otro personahenan cu ta atractivo y cu despues ta bira algo menasante, e muchanan a bin desaroyando angustia y depresion.

Ta comproba cu adrenalina tambe ta causa posibel cuadro di ansiedad na edadnan hopi hoben, cu personahenan como Huggy Wuggy, muchanan por presenta un miedo nobo, como por ehemplo, miedo di scuridad of di nan keda su so.

“Ora bo ta duna un dispositivo na un mucha of hoben pa wak un video, ta bon pa revisa cu no tin nada straño, manera a pasa den otro ocasionnan cu tabata aparece algo inapropia”, nan ta indica.

Nan ta recomenda mayornan pa haci uso di control parental y Youtube Kids, un plataforma crea specialmente pa muchanan.

Na Merca y Reino Uni a bati alarma pa e personahe aki cu ta causa soñonan malo y traumanan, mediante rednan social, diferente psicologo ta señala cu muchanan por wordo exponi na contenido violento stimula pa e color, luznan, zonido y movemento di Huggy Wuggy.

Na Aruba docentenan ya caba a cuminsa bati alarma y pa asina ey cuminsa conscientisa mayornan tocante e problematica aki caminda cu tin muchanan den comunidad cu ta hungando e wega aki, tambe a keda conoci cu e popchi aki ta parce na e parti di Add riba Youtube, Tik Tok na unda cu e version rosa di esaki, Kissy Missy compañera di Huggy Wuggy, tambe ta parce haciendo diferente accionnan como matando un hende cu un bat di baseball, pasando e auto riba e hungado, kita nan cabes, maneranan horibel pa muri cu muchanan ta conta cu nan ta mira riba e wega aki.

Mayornan mester pone extra atencion riba kico muchanan ta wak ora nan ta bezig riba tablet, telefon of otro dispositivo, “nos no sa con leu e muchanan por hiba lo cual nan ta mira, pa despues no mester yega cu nos ta haya e tipo di weganan aki cu ta wordo hunga pa nos muchanan”, docente di scol a sigura.

Ademas, el a sigura cu hopi muchanan despues di hunga e wega aki nan a cuminsa di sinti miedo di keda nan so den un luga, mal soño di e cosnan cu nan ta haya, ta pa e motibo ey cu ta pidi na mayornan pa keda atento cu nan yiunan ora nan ta usa un dispositivo.