Algun medionan di comunicacion ayera a publica cu hues a prohibi abogadonan pa haya documentonan cu Benny Sevinger a duna na Landsrecherche, esaki den marco di e caso penal Avestruz.
Manera ta conoci, e sospechoso principal di e caso aki ta e ex-minister y awor parlamentario di partido di AVP, Oslyn Benito “Benny” Sevinger e cual a entrega na Landsrecherche documentonan cu supuestamente tin relacion cu maneho di terenonan di e actual gabinete ora el a wordo interoga y cu lo wordo inclui den e caso penal aki.
Un otro peticion cu abogadonan tabatin ta pa manda e caso na un hues comisario pa asina ey por scucha e testigonan cu a ser aproba pa wordo scucha, segun a ser menciona, ta testigonan cu abogadonan tabata kier pa nan wordo scucha den corte , hues a señala cu esunnan cu fiscal a aproba lo wordo scucha y cu otronan no ta relevante pa e caso.
Di mesun manera, hues a acepta e peticion cu sospechosonan por tin contacto cu otro, ya cu esaki a keda prohibi anteriormente.
Hues a informa cu dia 14 di juni pa 11or di mainta lo haci un actualisacion di e caso pa mira con leu e investigacion ta bayendo pa asina finalmente haya sa un fecha final pa trata e caso di manera integral.
