(NTN24) – Diamars ultimo, presidente di Peru, Pedro Castillo a anuncia e fin di un toque de queda cu a wordo decreta na Lima y waf di El Callao pa contene protestanan pa aumento di prijs di combustibel y cuminda.

“For di awo nos ta laga sin efecto e toque de queda. Ta coresponde pa yama na trankilidad di e pueblo Peruano”, Castillo a bisa sinta banda di e presidente di Congreso, opositor Maria del Carmen Avila.

Fin di toque de queda a ser ricibi pa centenares di manifestantenan cu alegria ora nan tabata reuni na edificio di Congreso y otro partinan di Lima, afirmando cu nan a wordo dobla e man di e presidente.

E protestanan a cuminsa 28 di maart ultimo debi na aumento di prijs di combustibel y a extende te otro gremionan di trahado, loke a genera violencia y disturbionan, segun BBC a sigura.

Aumento general di costo di bida a pega den e cartera di ciudadanonan Peruano, pa loke a registra e datonan mas halto di inflacion den decadanan.

Indice di prijs di consumidor na Lima, referencia na Peru, a crece 1.48% na maart, e variacion mensual mas halto for di februari di 1996, segun datonan di Instituto Nacional di Estadistica y Informatico (INEI).

Aumento di prijs di combustibel y lubricante mas pasashi a causa impacto den e resultado di inflacion.

Durante ultimo 12 luna e crecemento di prijsnan na e pais sur Americano a alcansa un 6.82%, hopi mas ariba di e cifra meta di inflacion fiha pa Banco Central di Reserva di Peru, cu ta entre %1 y 3% di inflacion pa aña.

Na maart di 2021 inflacion tabata di 2.6% mientras cu na e mesun luna di añanan 2020 y 2019 a ubica na 1.82% y 2.25%.

Tambe, Castillo a dicidi di elimina impuesto selectivo di combustibel pa asina calma e protestanan y malcontento di e gremio.

Ademas, a decreta un aumento di 10% di e sueldo minimo, cu lo subi for di 930 pa 1.025 soles (280 dollar) for di 1 di mei, segun BBC.

Den e protestanan, 25 polis a resulta herido pa via di enfrentamento cu manifestantenan cu tabata protesta contra e presidente y cu a causa dañonan na Palacio di Husticia y sede nacional di Fiscalia.

Por lo menos 25 region di Peru a sufri di blokeo den varios caminda, incluyendo algun cu acceso na Lima, capital cu a reporta e kimamento di tairanan y peahenan.

Por lo menos 4 persona a muri na Peru durante e welga di transporte cu a cumpli un siman, sinembargo, ningun di e victimanan mortal a muri den enfrentamento cu autoridadnan segun minister di Defensa Jose Luis Gavidia a sigura.