Lamentablemente ta mira cu e situacion na Ucrania ta tumando un curso diferente y tin mortonan cruel tumando luga. E efectonan indirecto cu ta premira pa Aruba ta entre otro efecto riba prijs di gasolin, pasobra Aruba ta importa crudo y e prijs di crudo a aumenta.
Prome Minister a duna di conoce cu Minister di Finanzas y Minister di Economia ta purbando mas cu ta posibel pa mitiga e aumento aki pa comunidad.
Pa loke ta trata prijs di awa y coriente, esaki ta cana diferente, y manera Minister Glenbert Croes a anuncia recientemente, por lo pronto esakinan no lo subi na Aruba, cual segun prome minister a publica riba su pagina di Facebook, ta hopi bon noticia.
Un otro efecto indirecto cu lo sinti, ta e crecemento economico. Aña pasa tabatin un pronostico hopi positivo, pero esaki a reduci. Ta kere cu e porcentahe di crecemento economico lo bolbe cambia y pronto lo analisa e impacto di esaki cual por conduci na un ‘begrotingswijziging’.
