Ken a causa crisis… Y ken ta resolve crisis…?

E debate final cu ministro presidente y ministro encarga cu finanzas no a logra yega na mucho mas nivel cu e debate riba presupuesto siman pasa. Demasiado tempo a bay perdi na lamento o elogio di pasado, mientras tratamento di presupuesto ta netamente momento pa papia di futuro.

Remarcable ta cu ainda, y atrobe, ta bin dilanti den debate parlamentario e asunto di con nos a yega na tin un (mega)debe awe. Aparentemente no por tin consenso riba ningun tipo di dato, cu ta bon disponible pa tur cu ta interesa. Por constata cu tin un trabao ainda pa medionan di comunicacion, pasobra e ciudadano cu ta sigui debate no ta haya tende e asunto aki manera cu e ta, sino segun e version cu ta conveni e parlamentario, segun su afiliacion. En corto por bisa cu tin dos linea cora ta core a traves di henter nos historia desde 1986. Eseynan ta e crecemento no controla di e aparato gubernamental y e crecemento di nos debe publico. Si ta bay huzga e dos partidonan grandi cu tabata den tur gabinete desde 1986, segun turno, por bisa cu ta esun actualmente den oposicion tabata e ‘big spender’, principalmente den e periodo di gobierno 2009 – 2017. Nan a hereda gobierno cu un relacion debe/GDP di 48,8% y a entrega gobierno na 2017 cu e mesun corelacion ey di 75,8%. Tur esaki segun Banco Central di Aruba. Den e añanan cu a sigui, e debe a baha levemente na 2018 y 2019, pa na 2020 e bay na e desastroso 115,1%. Esaki naturalmente pa via di e crisis economico y financiero causa pa e pandemia di Covid-19.

Nos ta core e riesgo awor di haya e critica cu nos ta presenta argumento na fabor di e actual gobierno, pa e debe publico cu tin awe. Esey no ta e caso, pasobra esey nos ta nos ‘core business’. No cu nos ta ignora hecho historico y veridico, al contrario, nos ta keda trece dilanti con nos a termina den e actual abismo, pero na e momento aki ta bira mas relevante con nos ta sigui… Y loke tin riba mesa pa esaki ta loke e actual gobierno ta presenta, y cu lo ta blanco di critica unda critica ta corecto y al caso, ni mas ni menos.

Kico ta e critica principal riba e actual maneho? Cu segun nos opinion gobierno no ta dispuesto di corta gasto, sino cu ta busca refugio financiero den aumento drastico di impuesto riba e comunidad, tanto ciudadano como empresario. Tur e consehonan di tur banda cu gobierno a ricibi, te na esunnan mas reciente, ta papia di dos cos: aumenta entrada y baha gasto structuralmente. Haciendo caso omiso di e ultimo parti aki ta ehecutando solamente e promer conseho. Y pakico ta haci esaki? Pa no mester enfrenta e posible consecuencianan di medida di saneamento di gasto di e aparato, usando creatividad pa sconde gasto na otro lugar den presupuesto. Por ehemplo e gastonan di personal di e proyecto Plan di Crisis Social, cu a move, en todo caso pa gran parti, pa e categoria di ‘Goederen & Diensten’ bao di e capa di e ‘Dienstverleningsovereenkomst’. Tambe e personanan cu a perde trabao na DVG ora a cuminza un investigacion penal contra nan pa nan participacion den e caso di fraude cu certificado di vacunacion falsifica, a bin resulta di tin tal tipo di convenio, y no un contrato laboral normal. E impresion ta cu asina varios miyon florin di e gastonan di personal por a bay riba otro post, dunando e cifranan di personal un tratamento cosmetico faborable y por mustra cu gobierno no a surpasa e limite di gasto di personal, acorda cu Hulanda. Sin embargo, e trikinan aki no ta yuda, gasto di Bienes & Servicio a aumenta, y finalmente mester paga tur esakinan anyway.

Y e asunto aki tin un aspecto mas: den e dienstverleningsovereenkomst ta kita practicamente tur derecho laboral di esnan contrata, compara cu un ‘arbeidscontractant’ normal na gobierno, mientras nan ta sigui traha bao di e mesun relacion di autoridad (gezagsverhouding) cu e contractant – y e ambtenaar – ta trahando. Niun hende no ta keha si, pasobra nan sa bon cla ta ken a pone nan ey… E problema ta cu ta dedicando energia y creatividad na e tipo di trivialidadnan aki, envez di cuminza realmente cu cumplimento cu loke a palabra na 2018 cu Hulanda: baha gasto di personal structuralmente. Manera CAft a trece dilanti den nan comentario riba presupuesto, practicamente gobierno no a haci nada den e sentido aki. Por ehemplo, a acorda kita e aumento structural y automatico di salario di ambtenaar – e asina yama ‘periodiek’ – pero hasta la fecha no a mira nada concreto di esaki. E ta requeri cambio di ley, pero no tin ningun cambio di ley den preparacion, asina leu cu nos sa. Igualmente, ta cay den repiticion di medida cu nos ta tende pa decadas caba, sin cu e reforma grandi cu mester tuma lugar pa ‘streamline’ aparato gubernamental, den cantidad y calidad, ta yega mas cerca. Keda ripiti logro invisible di ‘e-governance’ no ta satisface.

Tin un disparidad ainda entre loke gobierno di Aruba kier logra – prolonga deficit pa 3 aña mas, pa por sigui gasta – y loke Hulanda ta pretende, esta surplus di presupuesto otro aña caba. E diferencia: gobierno su criterio mas importante ta keda e proximo eleccion. Nada nobo. Asina nos sa ken a causa crisis, pero no ta mira ainda ken ta resolv’e.