Diabierna atardi na corte di prome instancia di Aruba 3 persona a huramenta dilanti huez pa eherce e funcion di deurwaarde. E 3 trahadornan aki ta den servicio di Banco di Seguro Social (SVb) y a termina nan estudio di deurwaarde na aña 2019.
Durante e pandemia y specialmente den e comienso caminda hopi hende a perde nan salario, Gobierno di Aruba a introduci e subsidio di salario cu e compania local tabata ricibi tur luna a traves di SVb. SVb semper a sa di brinda e seguridad na Aruba su comunidad. P’esey ta hopi importante pa fortifica SVb pa nan sigui eherce nan trabao debidamente y segun leynan di seguro di trahador, Minister di Salud Publico ta remarca.
Segun DVG splica den un comunicado di prensa, antes aki tabatin un solo deurwaarder pero despues di e ceremonia oficial ayera tardi, e grupo a crece te na cuater. E unico deurwaarder tabata Anthony Hill. Pero awor tres otro colega a sigui un curso di dos aña pa completa e educacion pa bira deurwaarder. E tres deurwaarder nobo ta Shannon Lopez-Penha, Lisa Henriquez y Rayon Lampe. Hues mr. J.M.J. (Jacques) Keltjens a conduci e ceremonia y a huramenta e deurwaardernan.
Elizabeth (Lisa) Henriquez tin 12 aña den servicio di SVb. Rayon Lampe tin 14 aña den servicio. E tabata e prome pa inscribi pa e curso y ta esun cu a slaag como esun di miho! Shannon Lopez-Penha tin 10 aña den servicio. Mester menciona cu a scoge e tres empleadonan aki memey di nuebe cu tabata interesa.
Minister Dangui Oduber ta felicita Shannon, Lisa y Rayon pa cu e gran logro aki y ta desea nan hopi exito den nan funcion nobo como deurwaarde. Sigur nan lo duna un gran aporte na SVb y e clase trahador.
Seguridad Social ta duna un contribucion enorme na creacion di un sociedad cu mas husticia social y mantencion di e leynan ta necesario pa garantisa cu tur ta duna nan contribucion husto. Ta sigui aspira siguridad social pa tur.
Banco di Seguro Social (SVb) ta existi desde aña 1986 y awendia tin riba 100 empleado den servicio.
