Cu un total di 3 tiro den su garganta, 1 den su cachete, 1 den su lomba y un saco di plastic riba su cabes su ex-casa a purba kita su bida, Chaldira Vis un victima di violencia relacional e cual su bida y di su famia a cambia por completo ta conta Bon Dia Aruba cu un rosea di tristesa 11 aña despues, con berdaderamente e tragedia a pasa.
Un dia prome, el a conta cu el haya problema caba cu su ex-casa Junior Quant, miho conoci como Blauw cu hasta el a yora y a dicidi di bay drumi trempan pa motibo cu e no kier a papia cune e anochi ey mas, esey tabata parti di e nightmare cu e tabata biba tur dia cu e persona cu casi a kita su bida den un di e formanan mas cruel cu por existi.
Den un entrevista exclusivo cu reportero di Bon Dia Aruba a haci cu Chaldira Vis el a splica cu e mainta despues, muchanan tabatin un family day na Palm Island y aunke el a conta cu e no kier a bay pa via cu e tabata sinti su mes malo -door di e anochi anterior- y no kier a disimula cu su hendenan cu cosnan tabata malo entre e y su ex-casa, el a dicidi di bay door di e muchanan cu tabata hopi entusiasma.
“Ora nos a yega eynan, mi kier a bay sinta band’i lama pasobra mi tabata kier ta mi so, mi tabata kier tin un tiki trankilidad cu mi no tabata kier sinta cu hopi hende rond di mi, e ora ey el a bisa mi: bay sinta caminda mi kier pa bo sinta, sino mi ta coy mi caminda y bay!” el a conta.
Ora Shaqion su yiu a scucha e palabranan aki, el a cuminsa yora pa loke Chaldira a bisa cu el a dicidi di sinta unda e persona aki tabata kier, den transcurso di dia su ex-casa tabata bebe y tabata tira palabranan pa Chaldira den presencia di su coleganan mes, “te cu un di Blauw su amigonan a par’e y a bis’e stop di tira palabra pa bo casa”, el a bisa.
Asina e dia mas horibel pa Chaldira tabata transcuriendo, “a mi tabata sinta band’i mi amiga cu e no tabata gusta, semper e tabata haci ferfelo si mi tin amistad cu mi amiga, te hasta el a coy mi telefon cu e kier a bin dal mi y mi amiga a hala mi atras y su coleganan a wantel’e, e casa di e coleganan a bisa mi pa nos bay otro parti y subi riba banana boat, ora nos a bin back el a sigui tira palabranan pa mi te ora nan a bisa mi cu a yega ora di nos bay y el a tira mi telefon den awa”.
Chaldira su amiga a dicidi di yama tata di Chaldira pa bin busca nan unda cu nan a bay te cas di su mama, cansa di e dia el a dicidi di drumi un rato hunto cu su yiu caminda el a expresa cu Shaqion ta sufri di diabetes, ora nan a lanta Shaqion, tabatin mester di insulina cu e no tabatin hunto cune e momento ey, sino na su cas.
Ta pa e motibo ey cu Chaldira a pidi su tata pa compañe pa cas un rato, pa busca insulina pa Shaquion y algun pañanan pa cambia, na e momento ey, segun Chaldira mes a conta, Shaquion no kier a separa di su mama e dia ey y tabata hopi straño, el a subi auto y a na tres hunto a bay direccion cas.
“Pa mala suerte, ami cu mi tata a bay y mi yiu a core bula den auto hunto cu nos, ora ma yega cas mi a topa un amigo di Blauw unda cu el a bisa mi cu e tabata razo pero mi no a worry, ora mi a drenta cas cu mi tabata casi yegando den camber, el a core cana y bin mi tras y a dal mi cu e cabo di scopet den mi cabes, na unda el a kap mi cabes y ma cay flauw, e ora ey el a tira mi, mi ta kere cu door di impacto di tiramento a laga bin na tino back, despues cu el a wak cu mi ta hala rosea ainda, el a coy un saco y mar’e rond di mi cabes pa mi no hala rosea mas” Chaldira a splica.
E tata di Chaldira a scapa manera el a sigura, pa motibo cu scopet no tabatin mas bala “el a usa tur e bala riba mi” el a declara.
5 bala Chaldira a haya den su curpa, tres na su nek na unda cu na Aruba a logra saca 2 di dje y na Hulanda a saca 2 mas, pero te ainda e tin un den su curpa segun el a expresa, patras di su cachete entre su horea, esey ta e causante cu Chaldira ta den rolstoel for di 11 aña caba pa motibo cu el a touch algun di su nervionan.
Su mannan tampoco tabata funciona na tal punto cu e no por usa un forki of un pen, par di añanan despues a logra opera un di nan.
E saco di plastic riba su cabes ta e ultimo momento cu Chaldira ta recorda di e dia ey, “cu cada bes cu mi a hala rosea, e ta bin mas y mas cerca, cu mi rosea ta corta mas y te dia di awe mi ta soña cu e saco ey, tambe ora mi tabata den coma na Colombia” el a señala.
Chaldira su bida a dal un giro di 180 grado, el a cambia por completo y “te dia di awe mi no por recupera mi bida, no ta di mi so, sino di mi famia, di mi tata, mi difunto mama, e parti mas tristo ta di mi yiu, e ta esun cu ta cuida mi actualmente, un mucha cu for di dia cu el a bin Hulanda cu 12 aña, ta nos dos so ta biba den cas y aworaki cu el a crece ta afectando e cu depresion”.
El a bisa cu su ex-casa Blauw un persona di actitud narcisista y violento, nunca por a permiti cu Chaldira por a lag’e “un par di luna prome cu e cos aki a pasa, el a bisa mi, cu si un dia e mester a cay cera, e ta tira mi prome cu e cay cera pasobra ni loco e ta den prison y a mi ta cana afo y haci lo cual mi kier”.
Pa personanan cu na e momentonan aki ta pasando den un situacion di abuso relacional, Chaldira a laga como mensahe pa nan busca ayudo profesional of papia cu un hende di confiansa, “no keda soporta nada pa e persona ey, pa motibo cu for di e prome instante ta keda soporta y no haci nada, e agresor ta haya cu e tin poder. No wanta abuso mas y stima bo mes, bisa cu bo tambe ta merece ta feliz, ni un hende ta merece maltrata nos, nos merece di ta stima y nos merece un bida”, Chaldira a finalisa.
