Recientemente, Oficina Central di Estadistica a presenta e resultadonan principal di e Indice di Prijs di Consumo pa luna di februari.

Indice di Prijs di Consumo pa luna di Februari 2022

E CPI pa luna di Februari 2022 ta 100.44, loke ta representa un subida di 0.4% compara cu e indice di Januari 2022 (100.07) y acumulando un caida di 0.2% te cu na Februari di e aña aki.

E cambio di e CPI pa e ultimo diesdos (12) lunanan (Februari 2021 te cu Februari 2022) ta 3.5%, un subida di 5.4 punto di porcentahe (ppt) compara cu e periodo corespondiente di aña pasa (-1.9%).

E promedio anual di e tasa di inflacion pa e periodo di Februari 2021 te cu Februari 2022 ta 1.7%, un subida di 3.9 ppt compara cu e -2.2% registra den e periodo di Februari 2020 te cu Februari 2021.

Durante e luna aki, ocho (8) di e diesdos (12) sectornan a registra subida di prijs. E subidanan cu tabata tin e mayor efecto riba e CPI a wordo registra pa e sectornan di “Transporte” (2.1%) y “Recreacion y cultura” (1.9%), causando un efecto di 0.28 y 0.19 ppt, respectivamente. E subidanan den e restante sectornan a contribui cu un efecto di 0.21 ppt riba e CPI di Februari 2022.

E subidanan aki a wordo contraresta parcialmente door di principalmente un caida den e indice di e sector di “Vivienda” (-0.7%) cu a contribui cu un efecto di -0.19 ppt riba e CPI di Februari 2022. E caidanan den e restante sectornan a contribui cu un efecto di -0.12 ppt riba e CPI di Februari 2022.

E subida den e sector di “Transporte” a wordo causa door di principalmente subida den e categoria “Gasto relaciona cu uso di vehiculo di transporte personal” (4.9%), causando un efecto di 0.40 ppt. E subida den e sector di “Recreacion y cultura” a wordo causa principalmente door di un subida di 6.3% den e categoria “Vacacion”, causando un efecto di 0.17 ppt.

E caida den e sector di “Vivienda” a wordo causa principalmente door di un caida den e categoria “Mantencion y reparacion di vivienda” (-4.2%), causando un efecto di -0.23 ppt.

Canasta di consumo

E canasta di consumo di e CPI ta consisti di 408 bienes y servicionan. Compara cu Januari 2022, 46.6% di e bienes y servicionan aki a conoce un aumento di prijs causando un efecto di 1.47 ppt, mientras cu 36.3% ta mustra un caida di prijs, cu a contribui cu un efecto di -1.10 ppt y pa e restante 17.2% no tabata tin cambio den prijs. Prijsnan di bienes a subi cu 0.1% y a causa un efecto di 0.06 ppt. Prijsnan di servicionan a conoce un subida di 0.7% y a causa un efecto di 0.31 ppt riba CPI di Februari 2022.

Core inflation

E CPIC (core inflation) – CPI excluyendo e efecto di energia y cuminda – a registra na Februari 2022 un subida di 0.5%. E indice di energia – cu ta consisti di e productonan: electricidad, awa, gasolin y diesel a registra un subida di 8.2%. E indice di cuminda a registra un subida di 1.2%.

Bestaansminimum

E bestaansminimum pa un hogar consistiendo di dos (2) adulto y dos (2) mucha (edad 0-14 aña) na Februari 2022 ta Afl. 4,931, un subida di Afl. 189 compara cu Februari 2021 (Afl. 4.742). E bestaansminimum pa un hogar di un (1) adulto ta Afl. 2,348, un subida di Afl. 90 compara cu Februari 2021 (Afl. 2.258).