Proyecto di boutique hotel lo tuma luga den area di San Nicolas

Ayera atardi, San Nicolas Business Asociation a ofrece un conferencia di prensa dilanti di ex Esso Club pa asina informa comunidad tocante un boutique hotel nobo cu lo wordo construi proximamente den e luga aki.

Andres Hernandez presidente di e fundacion a expresa cu despues cu nan ta confrontando nan mes cu e stop di construccion di Hotel Secret’s na Baby Beach, e proyecto aki si lo bay ta posibel na un luga cu ta bandona pa varios aña caba y cu ta mustra peligroso pa algun muchanan local cu ta drenta eynan pa hunga.

Ayera nan a yama na un conferencia di prensa pa celebra cu e inversionista nobo a firma pa un proyecto “cu ta bay bira un hoya pa nos” manera Hernandez a indica.

Segun el a menciona esaki ta bay ta un boutique hotel bunita cu lo wordo traha den pro di naturalesa y cu un toke di Aruba su cultura y su tradicion cu lo trece “un prosperidad grandisimo pariba di brug”, el a sigura.

Esaki tambe lo nifica un cambio pa doñonan di negoshinan cerca di e area aki cu segun Hernandez a expresa, e inversionista no lo bin cu un restaurant loke ta nifica un siguridad pa e negoshinan di famianan Arubiano cu ta rond di e area cu a cuminsa cu nan negoshinan hopi aña pasa.

“Nos ta contento cu esaki ta bayendo hopi bon, pero cu e hotel aki nos ta cambiando full e area, boso sa cu ta bay tin proyectonan nos dilanti cu ta bay tuma luga na unda cu minister di Turismo Dangui Oduber a laga sa caba cu ta bay tin e cambionan eynan y esaki ta bay ta super pro pa e tipo di cliente cu ta bay usa un hotel di e categoria y haltura aki”, Hernandez a declara.

Asina mes, el a comenta cu San Nicolas ta di fiesta unda cu ainda tin mas proyectonan cu nan ta bringando pe , asina mes el a gradici DIP pa e planificacion cu nan a haci pariba di brug “e cual ta mantene nos identidad, nos no ta bay bira pabou di brug, si no cu nos ta bay trata di mantene nos identidad y esaki tabata necesario”, el a bisa.

El a papia tambe riba e palabra balans unda el a remarca cu turismo semper tabata full pabou y cu San Nicolas a keda manera tur hende sa, cu a yega momento cu nan ta preparando pa e añanan di cambio y nan ta preparando San Nicolas y pariba di brug p’e.

Di loke ta trata e hotel, Hernandez a señala cu esaki no lo stroba e localnan pa motibo cu e ta bay ta ubica na un pida cu no ta wordo usa mas y cu lo bay ta un orguyo, “orguyo ta hopi halto, kiermen cu un biaha cu nos tin esaki, cu nos tin cambionan positivo na Baby Beach, e cambionan cu lo tin na Rodgers Beach, nos ta bay ta super orguyoso ora esakinan lo pasa”.

Di su parti, Alberto Perret cu ta representa The Perret Group cu ta encarga di e proyecto aki a splica cu e dia di ayera tabata un di celebracion unda cu nan tabata buscando oportunidadnan di inversion na San Nicolas for di 2015 y ayera tabata e prome dia cu nan por bisa cu “cosnan bon ta bin”, tambe el a gradici San Nicolas Business Asociation pa e apoyo, igualmente na prome minister Evelyn Wever-Croes cu for di e prome dia tambe a duna su apoyo.

El a sigura cu esaki lo ta un hotel cu lo respeta medio ambiente conforma solamente di dos piso y 40 unidad rondona di naturalesa, tambe el a menciona cu nan lo trece back loke hopi tempo pasa tabata existi cu tabata un discoteca cu palonan di coco, “esey ta mas o menos e idea”, el a finalisa.