Abuso sexual ta un problema cu ta afecta tur paisnan na mundo unda cu na Aruba e casonan pa esaki ta alarmante y ta p’esey cu Fundacion Respeta mi ayera mainta a duna un conferencia di prensa pa asina informa tocante e actividadnan cu na tin pa luna di april tocante prevencion di abuso di mucha y otro tiponan di abuso.

Jeanmire van der Werf trahado preventivo di e fundacion a splica cu nan ta traha riba prevencion di formanan di abuso di mucha como abuso fisico, abuso sexual, abuso verbal y emocional, negligencia tanto emocional como fisico, unda cu e ora e mucha tambe ta bira testigo di violencia relacional.

Mes cos cu aña pasa na luna di april, cu ta e luna unda nan ta para mas keto cu e topico di prevencion di abuso di mucha, Van der Werf a bisa cu pa 2022 nan tin un kalender di actividadnan, tambe nan a duna di conoce un cambio den nan imagen unda cu e logo di e fundacion a wordo cambia.

E logo cu nan tabatin pa basta aña di color blauw a ser cambia caminda na 2019 nan a participa den proyecto Pitch Time, den cual nan a traha hopi di cerca cu hobennan cu a presenta nan perspectiva riba e cambio di logo di e fundacion.

“Nos ta pensa cu a bira tempo pa e logo bira mas child friendly, cu e meta e cual ta di 0 pa 18 aña” el a sigura.

Awor, nan a presenta nan logo nobo cu mas color y cu ta representa e etapanan di muchanan y hobennan cu e fundacion ta traha, “den e logo aki nos ta para pa e parti importante pa duna muchanan espacio pa nan por vocifera nan opinion, pero tambe pone limitenan saludabel pa loke ta trata nan curpanan”, Van der Werf a señala.

Di mesun manera, el a conta cu tambe ta importante pa destaca cu adultonan ta duna espacio pa muchanan para pa nan mes di un forma respetuoso, “a nos como adulto, ta modela pa e muchanan, nan ta wak nos y nan ta wak kico nos ta haci y e manera con nos ta comunica”.

‘Educa pa proteha’ ta e slogan cu e logo nobo di e fundacion ta estrena cu a wordo traha pa hobennan di e proyecto Pitch Time manera a wordo menciona caba pa motibo cu si kier proteha muchanan y si kier traha riba prevencion, educacion y informacion ta hopi importante, e tratado di derecho di mucha ta bisa esaki tambe, “nos muchanan tin derecho riba informacion y derecho pa educacion, educacion cu ta un yabi pa bo por traha riba prevencion y pa educa e muchanan tocante nan reglanan di siguridad pero tambe kico ta abuso”, el a expresa.

Tin casonan di muchanan cu a biba asina hopi tempo den abuso cu nan a normalisa esey y no ta normal cu un mucha cu ta bay cas ta wordo grita, ta wordo maltrata of sota, tambe por wak mayornan cu ta pleita cu otro, p’esey e aña aki nan kier enfoca riba e topico aki.

Micheline Mathurin cu tin e funcion di bureau medewerker na e fundacion, a manifesta cu awe nan lo lansa un spot tocante testigo di violencia relacional e cual ta disponibel riba social media como Facebook, caminda nan ta enfoca riba e problema unda cu mayornan ta pleita y mucha ta scucha.

Esaki ta dos aña consecutivo cu Fundacion Respeta mi ta traha cu e tema di ‘Testigo di Violencia Relacional’ pa motibo cu nan kier para keto na dje un rato y menciona cu esaki tambe ta un forma di abuso cu hopi biaha ta wordo laga afo.

“Hopi biaha nos tin e tendencia di enfoke riba abuso sexual, pero tambe tin otro formanan cu nos tin cu para keto na dje de bes en cuando pa asina educa nos comunidad”, el a bisa.

Tambe, el a indica cu mayoria di biaha violencia relacional ta tuma luga y riba rednan social y medio di comunicacion ta sali articulonan caminda por wak cu semper tin muchanan cu ta envolvi den esaki.

E aña aki nan ta enfoca riba e problema, segun Mathurina señala, pero den transcurso di lunanan tambe lo enfoca riba tipnan y hermentnan con pa evita cu e tipo di abuso aki lo tuma forma na cas.

Un testigo di violencia relacional no ta solamente entre mayornan sino cu tambe por ta entre mayornan cu otro miembro di famia y e ta tuma luga na cas of den otro ambiente.

Rosemary Bustillos conhuntamente cu Carlina van Vliet cu ta studiantenan di Social Worker Development na Universidad di Aruba na e momentonan aki ta haciendo nan stage na Fundacion Respeta mi unda cu nan a organisa diferente actividad pa e luna di april.

Segun e kalender cu nan mes a crea, nan ta cuminsa e luna aki door di lansa e logo oficial di e fundacion hunto cu e website y e spot ‘Testigo di Violencia Relacional’, el a splica cu tur diamars nan ta bay lansa un post riba rednan social, tur diabierna nan lo publica quiznan pa asina nan por haya sa e percepcion di comunidad di Aruba tocante esaki y na final nan lo saca un ganado cu lo haya un premio atractivo.

Nan tambe a declara cu nan lo ta organisando diferente charla unda cu dia 14 di april lo tin un charla conhuntamente cu Fundacion contra Violencia Relacional dirigi na tur comunidad y dia 25 di april lo tin un charla dirigi na mayornan so, ademas el a anuncia otro dos charla cu e topico di “Mi curpa ta di mi so” dirigi pa muchanan y “Teen dating violence” cu nan ta organisando conhuntamente cu Centro di Hoben y Famia.

Pa finalisa, nan a invita comunidad henter y specialmente mayornan pa uni na e actividadnan aki pa yuda cu e parti di conscientisacion.