Minister President: “No tin un stabilidad den e crecemento”; “Nos ta wak cu e ta keda subi baha y cu esey nos tin cu biba”

Ayera den oranan di mainta a tuma un conferencia di prensa unda Prome Minister, Evelyn Wever-Croes, a elabora ariba presupuesto di aña 2022 y a menciona algun area di prioridad cu ta inclui den e presupuesto di su ministerionan e aña aki.

Manera ta conoci a cuminsa cu e tratamento di presupuesto den parlamento e siman aki. E tratamento a cuminsa diaranson 30 di maart caminda a toca turno na Minister Rocco Tjon y Minister Glenbert Croes presenta presupuesto di nan ministerionan. Diahuebs a toca turno na Minister Ursell Arends y Minister Dangui Oduber, awe ta toca turno na Minister Endy Croes y Geoffrey Wever, y dialuna proximo ta turno di Minister Xiomara Maduro y Prome Minister.

Minister President a remarca cu presupuesto 2022 ta bastante atrasa. Ta algo cu mester tabata cla en realidad prome cu aña bolter, pero el a subraya cu e retonan financiero cu pais Aruba a encontra, cu ta cambia constantemente, ta haciele dificil pa por traha un presupuesto.

Aworaki Gobierno di Aruba ta presenta e presupuesto aki cu, segun Prome Minister mes a expresa, “honestamente lo ta algo preliminar”. El a splica cu e motibo pa esaki ta pasobra e desaroyo di pais Aruba, un rato economia ta crece hopi lihe, despues e crecemento ta wordo afecta manera a sucede durante e ola di Omicron y aworaki economia ta den crecemento atrobe.

Na esaki el a agrega e conflicto arma na Ucrania cu ta bolbe afecta e desaroyo economico, “kiermen nos no tin un stabilidad den e crecemento. Nos ta wak cu e ta keda subi baha y cu esey nos tin cu biba”.

El a indica cu muy probablemente durante e segundo mita di aña gobierno lo ta den parlamento atrobe cu nota di cambio caminda ta adapta dependiendo di kico e desaroyonan tabata durante e prome lunanan di aña pa cu e crecemento economico y e gastonan cu tin pa pais Aruba.

“Esaki ta un presupuesto hopi importante, pasobra esaki ta e aña cu nos a decreta como aña di inversion y oportunidad y esaki ta algo cu nos a purba pa e wordo refleha tambe den e presupuesto”, Minister President a bisa.

Pero di otro banda el a enfatisa cu mester tene cuenta tambe cu e limitacionnan financiero cu tin debi na e situacion financiero cu e pandemia a ocasiona y e espacio financiero cu tin por ta solamente pa locual cu ta realmente necesario. “Bo no ta bay mira inversionnan hopi grandi di cambio, pero si di locual cu ta sumamente necesario”, el a señala.

“Ta hopi importante pa e aña aki mas cu nunca nos traha hunto pa por logra e metanan, defini e plannan, defini e desaroyonan pasobra ora bo posibilidad financiero ta asina poco, ta mas ainda bo tin cu uni forsa pa bo por logra locual cu bo kier logra”, el a agrega.

Pa loke ta e presupuesto di e ministerionan cu ta cay bao di Minister President, el a menciona algun areanan di prioridad cu ta inclui den e presupuesto di 2022 y pakico esakinan ta asina importante na e momentonan aki.

Un di e inversionnan importante den presupuesto di e aña aki ta un inversion di 16 miyon florin den RWZI pa renobacion y expansion di RWZI cu tin aworaki pa yega na e capacidad cu Aruba por handle. Minister President a splica cu esaki nan ta concentra tambe pa mehora e calidad di awa pa por inclui mas oxigeno den e plas- y e tankinan, pasobra inclui mas oxigeno e calidad di awa ta mehora y tambe ta baha e molester di holo.

El a remarca tambe cu esaki ta un proyecto cu DOW ta encarga pa ehecuta y cu ta wordo haci conhuntamente cu minister Ursell Arends di naturalesa. “E ta un proyecto cu e ta encabesa y cu nos como infrastructura, den e caso aki DOW, ta sostene”, el a indica.

Otro inversion importante cu Minister President a menciona ta e saneamento di e rioolering den area di Royal Plaza y edificio di ex-DOW. No ta desconoci cu tin hopi problema cu rioolering y esaki lo wordo adresa cu e presupuesto cu tin aworaki.

Tambe tin un situacion fastioso na Palm Beach, Tanki Leendert y Pos Chikito caminda cu tin biaha ora cu hopi awa yobe tin molester di inundacion den areanan aki y esaki tambe Minister President a inclui den su presupuesto.

Otro aspecto cu ta inlcui den presupuesto 2022 ta e tema di e-Government. e-Government ta digitalisacion di e procesonan den gobierno y Minister President a remarca cu esaki ta algo sumamente necesario pa un bon funcionamento di gobierno.

Segun el a sigui splica, loke Gobierno ta desea ta pa yega na un situacion cu un ciudadano no tin cu bay diferente loket of departamento di gobierno cu e mesun peticion of informacion. Gobierno kier yega na e situacion cu ta un caminda e ciudadano ta duna su datonan y despues unda cu e ciudadano bay, cu un number unico cu e ta haya, e ta wordo reconoci na diferente departamento.

“Pero no esey so, nos kier pa e informacionnan wordo acopla na otro di tal forma cu e ta sirbi e ciudadano miho. Nos kier yega na e punto cu tur servicio por wordo ofreci na un solo loket of, locual cu gobierno kier yega na dje, ta pa ricibi e servicio for di cas”, el a destaca.

Tin dos aspecto hopi importante cu mester tene cuenta cune ora cu ta papia di e-Government, Minister a resalta. Uno ta e parti di seguridad y privacidad, mester pone hopi atencion na seguridad cibernetico, y e di dos mas cu claro ta e inversion pasobra segun el a informa pa e proyecto aki keda cla mester di un inversion hopi grandi cu ta bay tuma basta aña.

El a enfatisa cu e presupuesto cu tin aworaki, cu ta un suma di mey miyon florin, no por acapara inmediatamente e proyecto completo. Pero el a splica cu otro aña tambe tin e mesun suma y asina nan lo sigui bay di departamento pa departamento y pa tur ta acopla riba un columna vertebral digital.

Pa loke ta trata e proyecto aki, Minister President a informa cu Gobierno di Aruba a aplica pa fondonan di Union Europeo y pa otro aña nan lo ricibi e fondonan aki pa agilisa e proceso aki y esey ta duna un avance di algun aña

Minister President a indica tambe cu den presupuesto di e aña aki a pone fondo disponibel tambe pa traha riba elimina e atrasonan cu tin den otorgamento di tereno. El a menciona cu DIP tin hopi peticion pendiente, riba shete mil persona cu tin peticion pendiente aworaki. Tin basta aña caba cu e tin e atrasonan aki y e problemanan ta debi na diferente factor.

Un factor ta cu no tin asina hopi tereno disponibel mas, pero loke si tin, el a remarca, ta terenonan cu a wordo otorga na hende cu no a usa nan den e tempo cu nan mester usa nan y e proceso ey lo cuminsa tambe caminda e hendenan cu no a usa nan tereno otorga lo mester entrega esaki back of el lo wordo kita for di nan.

Otro factor cu el a menciona cu ta hunga un rol ta cu tin hopi investigacion andando na DIP, entre otro e caso Avestruz y caso Flamingo. Lamentablemente cada biaha cu mester haci un investigacion esaki ta frena e trabounan cu mester wordo haci na DIP y esaki no ta yuda pa agilisa e proceso. “Nos a traha un plan pa con nos ta bay elimina e retraso aki”, el a enfatisa.

“Tin varios punto mas cu nos lo trata den parlamento otro siman y nos ta spera y confia cu nos por haya e sosten di parlamento pa ehecuta e proyectonan aki pa gobierno por sigui ehecuta e vision cu nos a bin ta ehecutando, principalmente e aña aki cu ta e aña di inversion y oportunidad”, Minister President a subraya.