Ayera atardi, Cuerpo di Polis di Aruba a informa cu nan a haya e carta cu cambionan oficial pa asina campamento den areanan di Fisherman’s Hut y Eagle por bay door e aña aki.
E topico aki a bin dilanti for di dianan pasa pa motibo cu algun personanan cu ta bin campando pa basta añanan den areanan aki a mustra nan mal contento riba rednan social, pa motibo cu algun permisonan a wordo nenga na diferente areanan como por ehemplo, Fisherman’s Hut y Eagle pa via di mal comprendemento riba ley di ROPV cu a drenta na vigor aña pasa.
Ta conoci cu den semana santa como un forma di tradicion un parti di comunidad di Aruba ta pidi nan permisonan pa asina nan por lanta nan campamento y disfruta di e dianan aki.
Den cuadro di esaki mester menciona cu luganan unda hende ta campa tradicionalmente ta cay bou di ‘bestaande situaties’ y ta keda intacto.
ROPV ta pa conserva beach y areanan natural, pero e ROPV tambe ta reconoce actividadnan existente y campamento cu no ta structural y siguiendo e liña aki, campamento por continua siguiendo e reglanan di Cuerpo Policial y reglanan di Orden Publico manera prome minister Evelyn Wever-Croes a confirma dialuna ultimo den un conferencia di prensa.
E ley ROPV ta pone mas responsabilidad riba ciudadano pa cuida naturalesa, sinembargo pa campamento, e ley no ta stroba e tradicion, particularmente pasobra e no ta structural. Esey ta un di e cambionan crucial y Cuerpo di Polis ta encarga cu orden publico.
Di su parti, redactor di Bon Dia Aruba a papia cu un campador na unda cu su nomber lo keda anonimo y el a expresa cu nan ta hopi entusiasma cu campamento ta bay tuma luga e aña aki despues di dos aña cu a ser cancela pa motibo di pandemia.
Aunke e area na unda e ta disfruta di e siman aki ta Fisherman’s Hut el a sigura cu ayera por fin nan haya e ‘green light’ pa asina nan por cuminsa haci nan preparacion cu ta tuma basta tempo, y placa tambe.
