Miembro di hunta directiva di HOH, Gregory Croeze ta reacciona: ‘IMSAN no lo cay bao maneho di HOH’

Den nos edicion di ayera, miembro di hunta directiva di HOH, Gregory Croeze a duna informacion tocante e situacion di institucionnan di cuido di salud, HOH y IMSAN, y posibilidad di fusion. Den e relato aki, el a amplia riba e relacion entre e dos institucion, y beneficionan pa e pashent.

Desaparicion di IMSAN

Tambe a destaca cu tin un mal comprendemento entre comunidad, cu ta pensa cu si bin cu fusion, IMSAN lo desaparece. “Al contrario!” Croeze a comenta. “E pueblo di p’ariba di brug ta bay beneficia mas.” E ta destaca cu maske tin spoedeisende hulp p’ariba, por ehemplo si un persona kibra un weso e no por haya e atencion ayanan. “No tin gipsmeester pa gips e. Mester bin akinan pa gips. Tampoco e por keda drumi ayanan, ayanan ta letterlijk di dialuna pa diabierna, dus nan no tin hospital cu ta ‘overnacht’.”

IMSAN no tin un dokter di emergencia, sino un poortarts, no por duna servicio extra na spoedeisende hulp. Eerste Hulp di HOH, ademas di tin un dokter di emergencia, tin specialistanan cu ta traha warda y ta keda ‘on-call’ den caso cu algo mester sucede. Asina den caso di un situacion di emergencia ta yama e dokter specialista cu por yega opera na cualkier ora di dia of anochi.

Ademas, HOH tin loke nan ta yama ‘policlinicanan’, cu ta ginecologia, dokter di mucha, urologia, entre otro. Den opinion di Croeze, si tabatin samenwerking cu IMSAN, lo por haci uso di salanan di clinica cu por tin na IMSAN pa e dokternan specialista bin duna servicio, sea un of dos biaha pa siman, p’ariba di brug. Asina e pashent no mester biaha te nort sino cu por ricibi atencion p’ariba di brug mes. E team di operacion lo por bay haci nan operacion na IMSAN tambe. Igualmente, e dokter di wowo di IMSAN lo por bay un biaha pa siman na HOH pa haci operacion pa e pashentnan p’abao di brug.

Ademas, na IMSAN tin radioterapia y na HOH kimioterapia, y si nan traha hunto lo por coordina un miho tratamento pa e pashent. “Si ta algo planea, lo por bisa e pashent por ehemplo, bo kier bay Playa, of bo kier warda pa dialuna bo bay cerca di bo cas, of cerca di bo trabao? Esey ta e beneficionan cu tin di traha hunto.”

Pa loke ta e idea cu IMSAN lo por cay bao di HOH, Croeze ta aclaria cu e no lo ta asina. “E no ta cay bao maneho di HOH, e ta mas un fusion, traha hunto, no cu un ta cay bao di otro. Dus esey no ta e intencion tampoco.”

“Nos no ta bay cera IMSAN. Mi ta lesa nan ta papia manera cu e trahadornan ta bay perde nan trabao. Absolutamente cu no! Eigenlijk nos kier brinda mas servicio ayanan pa asina e pashent no mester bin akinan.”

Bon Dia Aruba a puntra Croeze kico ta preveniendo actualmente e tipo di samenwerking en cuestion. No lo por traha hunto maske ta instancianan separa?
Pa loke ta fusion, e obstaculo ta cu ‘tin diferencia grandi den e CAO, esey ta un’, Croeze a bisa. Por ehemplo, maske no tin gran diferencia den salario, na IMSAN nan ta ricibi algun bonus cu no tin na HOH. Ademas, na IMSAN ‘bo no ta traha warda’, cual ta un condicion hopi atractivo pa e empleadonan, entre otro.

Pa loke ta un samenwerking, Croeze ta mira cu no tin boluntad pa esaki. “Boluntad di tur dos banda pa traha hunto. Hopi hende cu ta traha na IMSAN a sali for di hospital, anto nan mira nan mes como apart.” A destaca cu nan no lo kier traha warda, por ehemplo. Ademas e trabao na HOH, por ehemplo cu casonan di trauma, ta hopi mas pisa. Esaki ta haci cu e empleadonan di IMSAN no tin boluntad pa traha den e condicionnan pisa na HOH.

Ademas, segun Croeze hopi hende cu ta traha den cuido di salud na Aruba ta biba p’ariba di brug, y pa e motibo aki tambe nan lo prefera di traha exclusivamente na IMSAN na lugar di tin warda entre e dos institucion. E distancia cortico entre cas y trabao tambe ta un motivacion pakico algun trahador a dicidi di bay IMSAN. Crecemento laboral, avance den nan carera, tambe por hunga un rol, den e sentido cu talbes nan a haya un oportunidad pa tuma un posicion mas halto na IMSAN, y asina cada persona tin nan motibonan personal pakico nan por preferi pa traha na un of otro institucion.

Croeze ta destaca cu unda nan ta mira cu lo tin un beneficio grandi si tabatin fusion, no ta realmente na e personal cu ta traha na cama di e pashent, sino mas e personal di management, IT, recurso humano, departamento di comunicacion. Croeze ta destaca cu e departamento di comunicacion di HOH ta existi ‘mas cu 20 aña caba’, y cu IMSAN lo por haci uso di esaki.

Den nos siguiente edicion, Croeze ta duna detaye riba e gastonan, presupuesto, y lo mas importante, e pashentnan.