Miembro di hunta directiva di HOH, Gregory Croeze ta reacciona: ‘E idea di fusion cu IMSAN ta pa beneficio di e pashent’

Recientemente den Bon Dia Aruba a trece dilanti algun relato den cual director di IMSAN, Dr. Joel Rajnherc a duna comentario tocante e idea pa fusion entre HOH y IMSAN. Sinembargo, miembro di hunta directiva di HOH, Gregory Croeze a reacciona bisando cu e idea principal ta pa beneficia e pashent p’ariba di brug.

Solidaridad

Croeze a cuminsa bisando cu for di su trahadornan y sindicato a ricibi un reaccion hopi ofendi pa comentarionan di Dr. Rajnherc, den cual a indica cu IMSAN tabata solidario cu recorte di salario durante pandemia, mientras empleadonan di HOH no. “Solidario tambe ta, ora tur otro lugar a cera, cu a bin medida na Aruba, hospital no a cera niun dia”, unda cu nan tabatin sticker special riba nan badge di trabao pa en caso cu polis para nan, nan por proba cu ta bayendo trabao. “E hendenan ta sinti ofendi pasobra nan a traha 24 ora pa dia, 7 dia pa siman, y hopi otro caminda no tabata traha – no tabata ni tin mag di traha – mester a keda cas.

Nan si mester a traha, loke a causa hopi discusion te hasta den nan mesun amigo y famianan, cu tabatin caso di problema di famia unda e famia no tabata kier pa nan bin traha na hospital cu e chens pa pega cu un virus cu niun hende sa kico e virus ta, mortal.” Famianan tabata preocupa cu nan lo trece e virus cas y infecta nan famia. “Nos ta hopi orguyoso di nos trahadornan cu tabata solidario.”

Recorte di salario

Hunta directiva ta maneha tres diferente entidad, cual ta hospital, bloedbank y laboratorio. Den total tin rond di 1250 trahador. “IMSAN ta diferente cu hospital”, Croeze a splica. “IMSAN ta loke nan ta yama ‘publiekrechtelijk rechtspersoon’, cual a wordo funda pa un ley, cual ta un Sui Generis. Hospital ta un stichting, un fundacion non-profit. Ta dos diferente entidad. Gobierno di Aruba a manda un peticion pa varios instancia na Aruba, entre otro IMSAN, pa nan por haci solidario door di haci recorte di 12.6 porciento di salario pa trahadornan y 20 porciento pa e directornan. Hospital no a haya e carta aki, pasobra hospital no ta un entidad publico, sino un fundacion. Pero si hospital a haya un reduccion den su presupuesto door di AZV. Pa motibo di esaki, hospital riba su mes a dicidi, mirando cu a corta nan entrada, tin cu baha gasto di biaha, a dicidi pa corta 5 porciento di e salarionan, stop bono di Pasco, stop algun seguro, cosnan cu nos a haci di biaha cu nos por maneha e hospital sin bay failliet. Pero anos no a wordo pidi pa haci e reduccion di salario manera IMSAN.”

Historia
Segun Croeze, pa compronde e idea di e fusion entre HOH y IMSAN, ‘mester compronde pakico IMSAN ta existi’. “IMSAN a wordo lanta na aña 2006. E tempo ey tabatin hopi e demanda pa cuido p’ariba di brug. Si bo unda HOH ta situa na Aruba, nos ta full nort, e no ta facilmente accesible pa tur hende. Tabatin un centro medico caba na San Nicolas, Centro Medico Rudy Engelbrecht. Despues nan a dicidi di muda na unda nan ta actualmente, a hacie mas grandi, y kier a brinda servicio pa pueblo p’ariba di brug, mas cerca. Eerste Hulp, e tempo aya Ambulansdienst, cu tabata un dienst di gobierno, a bay bao IMSAN. Despues na 2013 of 2014 nan a drenta den servicio di IMSAN, pero nan tabata ter beschikking gesteld.

Croeze mes anteriormente tabata traha na IMSAN, y asina a mira personalmente e crecemento di e instituto aki. “Na aña 2011, tempo cu mi a yega, tabatin 90 empleado. Pa ora mi a bay na 2020, tabatin 220-230 empleado mas o menos. Awo, segun articulo [red. di Bon Dia Aruba cu Dr. Rajnherc] tin mas cu 260 empleado, dus e ta crece.”

“Tempo ami a yega e presupuesto tabata 15 miyon florin, awo e ta riba 40 miyon florin. Mi ta contento cu e ta crece, pasobra e tin cu yuda brinda mas na e pueblo p’ariba di brug.”

Asina IMSAN a bin cu servicio, manera operacion di wowo, radioterapia.

Fusion

Segun Croeze, tabatin combersacionnan riba ‘samenwerking’ entre IMSAN y HOH for di 2008, 2009. “A yega di sinta na mesa, con nos ta bay traha hunto – pasobra nos tin un centro di dialisis, IMSAN a haya un centro di dialisis na 2014, dus con nos por traha hunto. Y cuminsa e tempo ey – y te ainda segun mi ta traha bon hunto.” Croeze a splica cu si tin un pashent cu no por wordo mira na IMSAN, e ta bay HOH, y similarmente si HOH ta yen, por manda un pashent p’ariba. “Dus e samenwerking t’ey.”

Na 2015 a firma un MoU pa haci samenwerking riba sala di operacion cu sterilisacion, pero e tempo aya e salanan di operacion di IMSAN no tabata cla ainda, nan a keda cla na 2019-2020. “Awo, e pandemia a dal. Supuestamente nos mester corta 60 miyon florin den cuido. AZV a bisa esey, gobierno a bisa esey, gobierno di Hulanda a bisa esey. Punto ta cu nos mester baha 60 miyon [florin den presupuesto.” Mirando esaki, a bin un comision di sector di cuido, cu a skirbi un rapport, ‘Cuido pa nos Cuido’ cu cantidad di recomendacion pa baha gasto. “Un di e recomendacionnan ta pa nos traha mas hunto, posiblemente pa yega na un fusion un dia, pero e samenwerking ta hopi importante. Dus e idea [di fusion] ta bin di e veld mes, di cuido”, Croeze a splica.

Den nos siguiente edicion, Sr. Croeze ta splica tocante e beneficionan di fusion pa cu personal di e institucionnan medico, pa reduccion di gasto di cuido di salud, y lo mas importante, pa beneficio di e pashent.