Luna di april ta conoci como e luna di conscientisacion di autismo y dia 2 di april ta wordo reconoci como Dia Mundial di Conscientisacion di Autismo, en conexion cu e celebracion aki Fundacion Autismo Aruba (FAA) a bin cu e iniciativa di organisa un siman di inclusion cu lo cuminsa ariba diasabra 2 di april cu un evento pa celebra e gran dia special aki.
Manera e fundacion a indica riba nan pagina oficial di Facebook, durante e siman di conscientisacion FAA lo brinda informacion practico pa educador y famianan riba topiconan importante tocante Autismo.
E siman di inclusion ta wordo organisa tambe conhuntamente cu Fundacion Arubano di esnan Visualmente Incapacita (FAVI) y FEPOH ken lo comparti tambe informacion pa personanan cu ta sufri di problemanan di bista y trastorno den desaroyo di idioma.
Ariba diasabra 2 di april, Dia Mundial di Conscientisacion di Autismo, lo tin un evento oficial, “Light it Up Blue” conhuntamente cu Gobierno di Aruba cu lo tuma luga dilanti di bestuurkantoor pa 7or di anochi. FAA ta invita tambe comunidad di Aruba pa para keto riba e dia aki y uni na e celebracion di Dia Mundial di Conscientisacion di Autismo y bisti na color blauw pa asina mustra apoyo pa tur persona autista.
Durante e siman di 4 pa 8 di april lo tin diferente presentacion cu lo toca diferente temanan importante. Riba dialuna 4 di april lo tin un presentacion tocante señalnan trempan di autismo y kico pa haci. Diamars 5 di april lo tin presentacion di inclusion na scol y den comunidad. Tambe lo toca e tema di uso di “fidget toys” y con esaki por yuda cu salud mental di personanan cu autismo.
Diaranson 6 di april lo tin un presentacion di FAVI titula ‘Bista riba Bista di bo Alumno y Yiu”. Y ariba diahuebs 7 di april e presentacion lo ta tocante trastorno den desaroyo di idioma (TOS/SLD), con pa reconoce y señala e trastornonan aki. E presentacion lo wordo duna pa FEPOH.
Fundacion Autismo Aruba a subraya cu cuponan pa e presentacionnan aki ta limita y a sugeri tur persona interesa pa registra pronto pa no perde e oportunidad pa asisti e presentacionnan aki cu lo toca temanan hopi importante. E presentacionnan aki ta habri tanto pa educador como pa mayor y famia. Pa educadornan e presentacionnan lo ta for di 5:30 pa 6:45 di atardi y pa mayornan y famia esakinan lo ta for di 7:15 pa 8:30 di anochi. Tur e presentacionnan lo tuma luga na Prinses Amalia Basisschool.
Ariba diabierna 8 di april lo tin un evento virtual organisa pa Nacionnan Uni cu lo tin como tema Educacion Inclusivo di Calidad pa Tur (Inclusive Quality Education for All). E evento aki lo tuma luga for di 10or pa 11:15 di mainta.
Segun Nacionnan Uni ta señala, desde cu e pandemia a cuminsa na 2020 mayoria di paisnan a anuncia un ciere temporal di scolnan lo cual a afecta mas di 90% di alumnonan na henter mundo. E interupcion di enseñansa causa pa e pandemia a deshaci añanan di progreso y a intensifica e desigualdadnan den educacion.
Hopi studiante cu autismo a wordo afecta specialmente di un manera desproporcional pa motibo di e interupcion di nan rutinanan, como tambe pa e servicio y apoyonan di cual nan ta depende di dje.
Educacion di calidad pa tur ta e clave di SDG (Sustainable Development Goals) #4. E obhetivo di SDG #4 ta enfoca pa garantisa un educacion di calidad inclusivo y igual y ta promove oportunidadnan di enseñansa permanente pa tur, como base pa mehora e bida di tur persona y reduci desigualdad.
Nacionnan Uni ta sigui splica cu e metanan specifico di SDG #4 ta referi na e necesidad di garantisa igualdad di acceso na tur nivel di educacion y formacion profesional pa personanan cu discapacidad, construi y mehora instalacionnan educativo cu ta sensibel na nan discapacidad y cu ta promove un ambiente di enseñansa inclusivo y efectivo pa tur.
E tema di educacion inclusivo ta fundamentalmente relaciona cu e enfoke di e celebracion di aña pasa, “Inclusion na luga di Trabou”. E panelistanan di aña pasa a enfatisa con crucial ta pa fomenta un educacion inclusivo di calidad pa personanan den e spectrum di autismo pa asina nan por desaroya nan potencial y logra un exito sostenibel den e mercado laboral.”Den e sentido aki, educacion inclusivo ta e clave di e promesa transformado di e Sustainable Development Goals, di no laga niun hende atras”.
