Parlamentario Marco Berlis (MEP): Ta papia di acuerdo historico di LNG gas entre Merca y Europa: Tempo lo demostra e vision excelente di Web Aruba NV y Gobierno

Tendecianan, noticianan y acuerdonan global concerniente LNG Gas ta sigui aumenta y yena front page di noticia tur caminda. Esaki no ta bini como un sorpresa ya cu ta esaki ta loke realmente ta sucediendo tur rond di mundo.

E mundo moderno ta alehando for di HFO y carbon pa hopi tempo caba como e combustible primordial den diferente sector industrial. Tambe ta normal pa decadanan caba cu hogarnan ta ricibi gas natural pa cushina y keinta nan cas den winter. Ta cientificamente comproba cu Gas Natural ta hopi mas limpi pa medio ambiente, economico y stabiel cu petroleo. Hechonan cu un pais manera Aruba sigur mester di dje urgentemente.

Aunke tin hopi desinformacion politico ta tuma lugar di parti oposicion riba e topico aki, cualkier hende cu ta haci su huiswerk riba internet lo yega hopi liher na e conclusion cu LNG Gas ta loke nos mester aworaki. Den un mundo unda e berdad no ta wordo honra pa motibonan di ganashi y interes partidario, nos mester ta dispuesto pa busca esaki pa nos mes. Asina so nos por educa nos mes y reconoce kico ta pasando realmente.

Di e forma aki mi por a ripara cu riba diabierna mainta Merca y Europa a anuncia un acuerdo pa reduci Europa su dependencia riba energia (Gas Natural) cu ta proviniente di Rusia. Presidente Joe Biden a anuncia den un conferencia di prensa cu Ursula von der Leyen cu tanto Merca y Europa a acorda pa traha riba un plan hunto pa reduci e dependencia di Europa riba gas natural di Rusia.

“Cu e acuerdo aki Merca lo reemplasa e suministro di LNG Gas cu nos ta ricibi di Rusia, y mirando pa futuro, Merca y Europa lo sigura un demanda stabiel di suministro pa un 50 miyon metro cubico adicional di LNG Gas te cu 2030,” Presidente di e Comision Europeo Ursula Von Der Leyen a añadi, splicando cu esaki lo reemplasa un tercera parti di importacionan di Gas proviniente di Rusia. Esaki sigur ta importante mirando cu e Union Europeo ta depende pa casi 40% di gas cu ta bini di Rusia.

Asina pueblo por wak cu e vision di Web Aruba NV y Eagle LNG ta uno beneficioso pa Aruba. Cambiando HFO pa Gas Natural, nos costo pa fuel lo baha enormemente. Contrario cu e ideanan ficticio cu oponentenan ta fabrica, compronde esaki; Oponentenan ta prefera HFO keda, pa asina instabilidad keda reina, prijsnan di awa y coriente keda instabiel, keda subi y caos por sigui asota den nos comunidad. Ta pesey ami ta kere den un Aruba cu ta opera riba Gas Natural. Gas natural ta e futuro pa Aruba y lo impulsa nos den un era di stabilidad y un medio ambiente mas limpi pa hopi aña nos dilanti.

Pa un cita tocante di e tema aki, pa informacion riba LNG Gas of Gas Natural sinti bo liber pa comunica cu mi na marco.berlis@parlamento.aw of yamami na 528-4639. Mi portanan ta habri pa sirbi pueblo di Aruba.