(AP) – Abogadonan di algun di e personanan fayeci y herida den aña pasa su festival di musica mortal Astroworld a isa den corte dialuna cu e rapper Travis Scott a viola un orden resultado di demandanan cu nan a pone den su contra como parti di un intento pa influencia posibel huradonan y reconstrui su reputacion prome cu e huicio.

Den medio di e problema ta un anuncio cu Scott a haci anteriormente e luna aki tocante proyecto HEAL, un iniciativa di 5 miyon dollar cu ta inclui fondo pa lidia cu desafionan di siguridad na festivalnan y eventonan di tamaño grandi. Cuerpo policial di Houston y oficialnan federal tin tempo ta investiga si Scott, promotor di concierto Live Nation y otronan a pone den luga suficiente medida di siguridad na Astroworld.

“Mi ekipo y ami a crea e proyecto HEAL pa tuma accion necesario pa apoya solucionnan real cu lo haci tur evento e espacio mas sigur den cual nan por ta. Mi semper lo honra e victimanan di e tragedia di Astroworld cu lo permanece den mi curason pa semper,” Scott a skirbi anteriormente e luna aki riba Instagram, despues cu e iniciativa a keda anuncia.”

“Bob Hilliard, un di e abogadonan representando e famia di mucha di 9 aña Exra Blount, e persona mas hoben cu a fayece di su heridanan durante e festival, a bisa durante e audiencia den corte dialuna cu Scott a usa e poder di su presencia den rednan social pa trata e siguridad di concierto, cual ta un di e problemanan cu ta den medio di e demanda.

Hues di districto Kristen Hawkins anteriormente a bisa cu abogadonan por conta media hechonan di e caso cu pasa den corte, pero e no tabata kier pa e abogadonan y otronan purba gana e caso den corte di opinion publico y posiblemente influencia e hurado.

Scott su accionnan “a afecta e poder di bo ordo,” Hilliard a bisa na Hawkins, ken ta e persona encarga cu e casi 500 demanda despues cu 10 persona a fayece y centeras a keda herida durante e concierto di dia 5 di november aña pasa cu Travis Scott.

Abogado di e rapper a bisa cu e anuncio haci pa e artista tocante e iniciativa, cual a inclui fondo pa becanan , no a viola e orden. Scott su abogadonan a argumenta cualkier esfuerso pa preveni su persona di papia tocante esaki y otro problemanan lo ta un violacion di su derecho constitucional di libertad di expresion.