(EFE) – Presidente di El Salvador, Nayib Bukele, dialuna ultimo a exigi na e gangnan mediante un mensahe riba Twitter pa nan “stop di mata hende awor” y a adverti cu si asesinatonan na e pais no ta stop, nan compañeronan deteni “tambe ta bay paga”.
“Nos tin 16.000 gang den nos poder. Aparte di 1.000 cu a ser deteni den dianan aki. Nos ta confisca tur cos, te corchonnan pa drumi, nos lo limita nan cuminda y awor nan no lo wak mas e solo. Stop di mata awor of nan ta bay paga tambe”, Bukele a publica.
E gangnan ta conta cu casi 70.000 miembro na El Salvador, di cual 16.000 ta den prison.
E mandatario Salvadoreño a acompaña su “mensahe na e gangnan” cu un video den cual por mira movemento di detenidonan den un centro penal, sin detaya si ta di dianan reciente.
El Salvador ta bao regimen di excepcion, decreta den oranan di marduga di diadomingo ultimo pa Congreso riba peticion di Bukele, pa locual a suspende algun garantia constitucional.
E derechonan suspendi ta e libertad di asociacion y reunion, derecho pa defensa, prohibicion di intervencion di telecomunicacion, ademas a amplia e plaso di detencion administrativo pa 15 dia, mientras normalmente ta di 3.
Aunke tin e medida extraordinario aki y tambe detencionnan masivo, diadomingo ultimo e gangnan a mantene nan desafio cu Gobierno di Bukele.
E pais a registra diabierna di siman pasa 14 homicidio, diadomingo 11 y diasabra 62, pa loke e ultimo dia ey a bira esun cu mas morto den historia reciente di El Salvador.
Autoridadnan ta atribui e ola di violencia na e gangnan, principalmente Mara Salvatrucha (MS13), aunke te ainda no a splica e motibo di e aumento di mortonan.
Esaki no ta e prome biaha cu Gobierno Salvadoreño ta busca combati e gangnan cu detencionnan masivo. Den pasado ex-presidente Francisco Flores (1999-2004) y Elias Antonio Saca (2004-2009) cu su plan di Man Duro y Super Man Duro tambe a hacie.
