Aunke cu oposicion ta bisa lo contrario, no ta comparti carta te ora cu investigacion ta cla

Prome Minister Wever Croes ta enfatisa cu ta Griffier a pidi pa suspende trahado di Parlamento

Ta diferente empleado publico ta pasa den e proceso di suspension pa asina por investiga keho contra nan y normal, como e Minister encarga cu asuntonan di personal di Gobierno, Evelyn Wever Croes no ta discuti e casonan specifico. Pero mirando cu el a bira blanco di critica pa a suspende un empleado publico, den e caso aki sra. Liesje Khemlani cu ta traha den e departamento di archive, Prome Minister Wever Croes a bisa cu e kier a splica e procedura.

Hopi hende no ta compronde cu ta un procedura standard y transparente y ta bon pa henter Aruba sa kico ta pasa den Gobierno ora drenta keho di posibel kiebro di integridad. Normalmente, e no ta mi custumber riba casonan individual y lo mi no haci’e tampoco.

E prome mandatario a papia di e procedura di un hecho cu a sosode bou su Ministerio. El a keda acerca pa Griffier di Parlamento pa firma un carta di suspension y ta esey el a haci tambe. “Ta mi responsabilidad cu mi no ta core p’e. Ta un procedura standard di Departamento di Recurso Humano, DRH, ta encamina ora cu cuminsa un investigacion cu nan ta ricibi.

E keho ta drenta DRH, ta sigui investigacion y despues ta bin e carta di suspension cu mester keda firma.” Segun mr. Wever Croes, e ta haya hopi peticion asina pero prome cu DRH presenta un carta di suspension cerca dje, ya caba a tuma luga investigacionnan cu ta duna e paso su base. “Ora cu mi haya un carta asina pa firma, nunca mi ta of por nenga, ni con bon mi conoce e persona, manera ta den e caso aki.

Investigacion ta andando y si no haya nada, lo lanta e suspension y e ora lo mira si e keho tabata funda si of no. Si e keho tabata funda, lo sigui un paso disciplinario y den caso cu nada sali, e persona lo por bolbe na su trabou. Pero Prome Minister a enfatisa si cu tur empleado publico mester ta consciente cu na trabou, mester tuma un actitud a-politico, irrespecto si ta de acuerdo cu Gobierno.

Nan mester tin posicion neutral. “No ta permiti pa haci trabou politico cu ekipo di Gobierno,” Evelyn Wever Croes a enfatisa. “Esaki ta algo cu tur empleado publico mester sa. Y ta varios a haya nan mes den problema pa motibo di esaki. Si berdad kier un Aruba integro, e ora mester stop di cuestion accion di instancia pa investiga casonan cu no ta integro. Integridad ta algo cu bo tin of no. Y si bo tin, bo mester actua, irrespecto ken e ta, si ta di mesun partido of famia.

No ta prome carta di suspension cu mi a firma di hende cu mi conoce.” Mr. Wever Croes a pidi pa tur hende pa asumi nan responsabilidad y a enfatisa cu Presidente di Parlamento y tambe Griffier, mr. Herman Hek sa kico a pasa cu sra. Khemlani. “A bin cu investigacion y Griffier a pidi mi pa firma e carta di suspension. Mi no ta aki pa pone man riba ningun hende. Tipo di cosnan ta sosode frecuentenan den Gobierno,” y a enfatisa si cu tur e keho mester ta bon funda.

Griffier no sa di peticion pa suspension

Di su banda, ayera lider di fraccion den oposicion drs. Marisol Lopez Tromp a bisa di a tende e declaracionnan di Prome Minister cu hopi asombro. E lider di MAS a bisa cu kisas awor comunidad por compronde pakico oposicion tabata kier un amienda den ley di Ombudsman pa sigura cu no por retir’e cu un mayoria chikito di coalicion.

Minister Presidente ta papia hopi di integridad, e ta papia di rapportnan di comisionnan, pero tur dia tin caso den ambtenarij unda ta tuma pasonan disciplinario. Esey ta algo cu Prome Minister mes a bisa durante su conferencia di prensa. Sea ta husto of no, e hefe di departamento ta cuminsa cu pasonan disciplinario,” Lopez Tromp a bisa, confirmando kico Prome Minister a splica tambe cu ta e procedura.

Pero te eynan e similaridad a keda tambe. “Den caso di Parlamento, ami ta riba e pagina di Gabinete Wever Croes, riba e pagina di Gobierno riba media social a lesa tocante e suspension. Ta riba pagina di Gobierno a lesa un susedido den Parlamento cu supuestamente ta na caminda pa bira independiente y nos ta mira hustamente con ta mina e institucion aki.” Segun Lopez Tromp ta Gobierno a manda un carta pa Parlamento pa Griffier firma pa algo cu no tabatin keho riba dje den Parlamento. Lopez Tromp a cita Prome Minister den su declaracionnan mainta y riba pagina di Gobierno cu a haya e empleado ta haci trabounan politico riba pagina di Gobierno.

Imagina bo si tur dia ta bay skirbi di tur empleado riba pagina di Gobierno. Esey no por. Pero di e trahado di Parlamento si ta haci’e. Cu ta berdad of no.”Lopez Tromp a cita declaracion di Evelyn Wever Croes: “’Despues cu a tuma nota di trabounan politico, a cuminsa un investigacion confronta e empleado cu pruebanan y e investigacion ta sigui su curso.’ Pero, nos di Parlamento, incluso Griffier, ta riba e pagina social di Gobierno a haya sa di esaki.”

Segun e miembro di oposicion, tabata despues cu a bin diferente reaccion, Minister President a saca un comunicado un paar di dia despues, y ta bisa. “’Ami como Minister encarga cu asuntonan di Personal a worde acerca pa Griffier di Parlamento pa mi firma un carta di suspension pa un empleado di Parlamento.’ Loke e ta sugeri cu no ta su persona a cuminsa cu e investigacion sino e Griffier,” drs. Lopez Tromp a bisa.

Segun Lopez Tromp, no por saca un keho contra un empleado publico sin mas. Mester bin un instruccion di un mandatario of hefe di departamento, “mientras cu ta duna impresion cu ta Griffier a inicia e investigacion. Esaki ta e forma di manipulacion di informacion. Imagina bo tur e investigacionnan riba persona suspendi, no solamente hende muhe, pero asina cu tin trahado ta haci nan trabou y ta trece claridad y transparencia y kier drecha situacion, ta haya nan mes den problema,” Lopez Tromp a ilustra.

El a usa como ehempel con Minister President kier a sconde e Carmabi raport. “Nos a wak con Minister Presidente no kier presenta e conseho cu tin riba UTV/ATV. Nos mester pidi’e, pero e no kier publik’e. Nos ta mira un Minister Presidente cu no kier bisa nada di acontecimentonan cu ta toca su coleganan Minister, e ta keda keto riba casonan na DIMAS, DPL y ta laga e Minister defende su cartera.”

Den e caso di Parlamento, ta trata di un instituto cu mester ta independiente, Marisol Lopez Tromp a sigui bisa y den e caso aki Minister Presidente ta haci declaracion politico riba pagina social di Gobierno, “pasobra si kier trata tur hende igual, di tur ambtenaar cu e mes ta bisa cu tin investigacion ta andando nan contra, e mester saca informacion tambe ken nan ta, di kico nan ta sospecha, con a saca nan di nan departamento y si tin castigo disciplinario. Awor nos ta den un situacion di un trahado di Parlamento ta suspendi pa investigacion, y nos aki den nos no tabata sa di nada y locual ta inhusto ta cu riba su pagina social, mientras cu e ta bisa cu ta Griffier a inicia e investigacion. Esey ta manipulante di Minister Presidente.”

Carta pa transparencia

Bon Dia Aruba a tuma contacto ayera tardi cu despecho di Minister Presidente pa puntra si por haya e carta cu Griffier a manda pa pidi pa e suspension. A haci e peticion basa riba e declaracion di mr. Wever Croes riba e peticion aki y di otro banda, di miembronan di oposicion cu ta bisa lo contrario.

Esta cu no ta Griffier a pidi pa e suspension. E carta lo trece claridad. “Na e momentonan aki tin investigacion andando. Durante investigacion ningun carta ta wordo comparti. Nos mester warda e investigacion keda cla prome cu bisa algo. Esaki ta e procedura standard,” Minister Presidente a bisa Bon Dia Aruba. Riba e pregunta di con anto a menciona e carta di Griffier, su contesta tabata: “ Ami a defende di atakenan cu mi a firma un carta cu un ambtenaar mes a laga publica. Mi no a publik’e y mi lo no publik’e tampoco,” tabata e reaccion.