Pa Ryan Leliendal, mondi no solamente a inspir’e den su creatividad pero awor ta e base di su negoshi, cu e ta maneha hunto cu su pareha Gianina de Freytas. No ta por nada cu nan a dicidi pa yama e negoshi ‘Dimondi.’
Dimondi ta e nomber di un negoshi di dos cu ta produciendo productonan netamente Arubiano di un nivel hopi halto. For di bakinan chikito di cement cu por usa pa pone mata, habon of otro artefacto, te na mesanan y bankinan traha na man, cu ta di calidad halto.
Leliendal mes a studia Bouwkunde na Hulanda y traha cu palo tabata mas bien un hobby. Su specialidad den estudio tabata diseño. E tempo ey e no tabata pensa mes pa habri un negoshi riba su mes. Es mas, e tabata pinta mapa pa trabao ora cu el a bolbe di Hulanda. Pero poco poco el a bolbe na su hobby di traha cu palo. El a cuminza cu usa palo di palet pa traha su productonan, pero no a dura mucho pa el a cuminza experimenta cu cement y palo.
Su productonan tabata asina pidi, cu cierto momento el a dicidi pa tuma e curashi y haci su arte, su man di obra su trabao permanente y segun su pareha, nunca mas a mira atras.
Much’i mondi
Ryan a crece den e mondinan na Paradera y semper tabata usa su mannan pa construi. Como adolescente, Ryan a traha henter un shack di palo di palet patras di su cas, unda e tabatin su propio espacio y asina e tabata pasa su dianan ta relaha den mondi.
Aunke cu Dimondi a cuminza cu palo di palet, awor e material ta ‘oak,’ conoci na Hulandes como eikenhout. A lo largo cu e negoshi Dimondi a cuminza haya nomber, a dicidi pa bay pa un palo mas duro. Y na Colombia a haya oak y e resultado ta un producto mas bunita y mas duradero. Segun Gianina de Freytas, ainda no a logra traha cu palo di kwihi cu ta uno mas duro ainda. (red. es mas, den combersacion cu personanan cu ta trahando producto di palo na Aruba, e conclusion ta mescos. E Pal’i Kwihi di Aruba ta sumamente duro cu ta rekeri bladenan hopi caro.
Esaki ta nifica cu e arte di mesa di kwihi Arubiano mester ta mucho mas aprecia y cu mester haci tur esfuerso pa mira con pa conserva e conocemento. E ‘carpintenan’ nobo en todo caso tin un admiracion enorme pa e trabao cu Arubianonan a haci pa crea obranan di arte di Pal’i Kwihi y varios a bisa cu ta lamenta cu tur e rozamento di mondi, a keda sin proteha e palo mes pa por a reusa pa productonan manera mesa y otro). “Kwihi ta hopi duro pa traha cune,” De Freytas a bisa.
Cement
E productonan di cement ta varia. Pa e creacionnan mas grandi, Ryan ta traha su mesun molde pa nan. E forma con e ta traha cu cement ta manera un artista cu no kier pura su producto. E cement mester ‘cura’ of seca pa algun siman prome cu e ta cla pa sak’e di e molde, pa despues pasa door di e proceso di feilamento. Tur esaki ta haci cu e material ta un producto fini, cu ta mustra delicado pero ta fuerte.
Pa Gianina y Ryan kendenan tin 12 aña hunto e tabata un emocion pa a tuma e decision hunto cu Dimondi ta bira nan negoshi y e unico trabao pa e artista/creador. “Ryan ta hopi creativo, pero no riba mercadeo. P’esey ami ta percura pa e promocion riba media social, conoce e clientenan, haci e administracion.” Tur esaki banda di su mesun trabao como partera. Es mas, e negoshi a haya su nomber aña pasa riba 14 di Februari.
Dimondi como tal ta ilustra con un hobby por bira un trabao pa e creador, cu den e caso aki ta Ryan. Pero e rol di De Freitas ta pa percura pa e aspecto empresarial. Un empresario mester di e sosten pa crece su negoshi y aki ta unda.
E ta un hende hopi creativo, cu ta traha cosnan chikito te na obhetonan grandi. “Tur cos di nos ta traha segun e cliente kier,” de Freytas a bisa . “’Custom-ordered.’ Por ehempel un cliente ta bin cerca nos cu un diseño y kier pa Ryan pone su creatividad den dje. Pues ta un combinacion di e loke e cliente kier y con Ryan ta interpreta esaki.”
Labor of love
“Nos clientenan ta varia. Nan por ta companianan cu kier un producto grandi pa nan edificio, te na hendenan cu kier algo pa nan cas. Pero tambe nos tin hopi turista como cliente cu kier algo unico di Aruba.
E meta di Dimondi ta pa e keda un producto local, cu ta produci productonan cu hende ta usa pero cu alabes ta artistico. E idea ta pa e negoshi crece, “pero Ryan ta asina ‘pietje precies’ cu ta nifica cu nos mester busca hende cu ta traha hopi netjes pa uni na Dimondi. E ta un hende cu ta controla delaster un detaye, y si crece e mester por siña pa ‘let it go,’” Gianina a bisa na harimento.
Pero, tanten, Ryan cu Gianina lo sigui ta traha tur dia pa y riba Dimondi. E tayer ta na cas, cu ta haci’e mas facil traha facilmente 12 a 14 ora tur dia. Y de Freytas no ta mustra preocupa. E ta goza di mira su pareha dedica na su arte.“Esaki ta un labor of love.”
