Scolnan no tin e capacidad ni docentenan pa provee un educacion adecua na muchanan di Ucrania

(NLTimes) – E escasez den maestronan na Hulanda ta aumentando preocupacion cu municipalidadnan y scolnan di lenguahe no lo por adecuadamente educa e gran fluho di muchanan cu ta biniendo for di Ucrania.

Miembronan di Gabinete y docentenan ta dividi den con por trata e problematica aki. Minister di Educacion Primario y Secundario Dennis Wiersma ta premira cu entre 15,000 pa 25,000 muchanan lo yega Hulanda for di Ucrania segun NOS. Scolnan di lenguahe en particular ta preocupa pa cu nan capacidad. “Den un siman nos a ricibi 50 registracion. Y nos ta yen caba,” Jacqueline van den Bor, director di Language School Hilversum a conta NOS.

Algun ta bisa cu no mester spera cu muchanan mas grandi di Ucrania lo siña e lenguahe inmediatamente, mirando cu e probabilidad ta mas halto cu nan lo por comunica cu muchanan di Hulanda den Igles. “Duna e muchanan aki training practico den un di e 200 profesion cu nan por siña na Aventus,” Martine van Tilburg, director di Aventus Training Center a expresa na NOS.

Den e municipalidad di Almere, un task force ta areglando mas espacio y a haya un docente cu ta papia e idioma di Ucrania. Sinembargo, e municipalidad ta spera 400 pa 500 mucha y scolnan di lenguahe no tin e capacidad pa ricibi asina hopi studiante, Theo Klein di Koerkamp of Taalcentrum Almere a splica.

“Nos ta purbando di aumenta e capacidad pa educacion na e muchanan nobo lo mas cu nos por,” Wiersma a declara. “Si esaki fracasa, nos mester crea facilidadnan temporario educacional pa e muchanan aki pa asina nos por preveni cu nan drenta e educacion general en masa.”