Josephine Albertus: “Nos como SIMAR no semper lo ta di acuerdo cu minister di enseñansa, pero den dialogo nos lo sigui pasobra e ta nos minister”

Den un entrevista pa Bon Dia Aruba presidente di sindicato SIMAR, Josephine Albertus, a informa con e reunion entre SIMAR y Minister di Enseñansa, Endy Croes, cual a tuma luga ariba diahuebs, a bay caminda e sindicato a expresa na minister algun punto importante di preocupacion pa loke ta trata e veld di enseñansa y maestronan.

Albertus a indica cu nan a toca diferente tema durante e reunion. Un di e temanan cu nan a trece pa dilanti ta tocante e instructornan di landamento (zweminstructeurs) riba cual el a subraya e importancia pa nan haya claridad riba nan posicion huridico. El a recorda cu bao di ministerio di e minister di enseñansa anterior, Rudy Lampe, a duna instructornan un OVO y den e OVO aki a pone cu nan mester a entrega hopi parti di nan premiesnan pa luna y un parti grandi di nan salario ta bay pa paga premies.

“Niun hende kier esey y nan no tabatin claridad tampoco riba nan posicion huridico. Ora nos minister di enseñansa actual a bin na posicion el a haci un cambio cu esey, el a trek in e OVO y nan a bay back riba nan posicion anterior. Esey ta un solucion temporario pero nos kier algo duradero. Dus aworaki nos ta bezig cu minister y el a bisa cu e ta bezig cu esey”, Albertus a informa.

El a menciona cu nan a trece pa dilanti algun punto riba miembronan individual, cosnan cu ainda no ta cla y nan tabatin tambe puntonan cu tin di haber cu e landspakket, cambionan cu mester bin y cu nan como sindicato kier transparencia riba dje. “Nos ta haya hopi importante pa informa e veld pa asina ora e cambionan bin tur hende ta na altura y e no ta un sospresa”, el a agrega.

Otro punto importante cu SIMAR a trece pa dilanti, y no pa prome biaha, ta e parti di e guia social. Albertus a remarca cu prome cu COVID-19 caba e problemanan social na Aruba tabata grandi pero por mira cu aworaki cu COVID-19 e probleanan social a bira pio y docentenan tambe ta bisa cu nan mester ayudo pa guia e alumnonan. Pero no solamente e guia pa e alumno ta importante, el a indica, pero e maestro tambe mester guia y pa cu esaki tin un plan riba mesa y SIMAR a toca e punto aki cu minister pa wak con ley e ta cu e plan aki.

Albertus a enfatisa cu como SIMAR nan a duna diferente conseho na minister cu den nan bista lo por yuda pa drecha cierto preocupacionnan den enseñansa. “Nos ta contento cu minister ta hopi abierto y a bisa cu el lo tuma nan den consideracion”, el a indica.

Tambe el a menciona cu como SIMAR nan a bisa cu nan ta dispuesto semper pa trece informacion afo mirando cu ya caba nan ta bezig cu e landspakket, nan ta den diferente comision y nan no tin problema pa haci esaki tambe den enseñansa, locual Albertus a subraya minister tambe a haya hopi bon.

Pa loke ta trata e tema di dianan di accion cu SIMAR a tene aña pasa, Albertus a subraya cu e luna aki nan a kita placa di cierto trahado y loke nan a vocifera na minister ta cu nan ta compronde cu semper Gobierno di Aruba por aplica “no work no pay”, pero na e manera cu el a ser haci aworaki, segun Albertus, no ta bon pasobra pa cierto hende si a kita, cierto hende no a kita, pa cierto hende a kita di mas y pa cierto hende a kita di menos.

El a agrega cu nan ta yame un “plichtverzuim” locual el a enfatisa no ta asina pasobra algun tempo pasa minister mes a saca un comunicado unda e ta bisa cu un trahado tin cu meld ora cu e ta bay participa den un accion. Albertus a indica cu e maestronan a meld y toch a pone esaki como plichtverzuim y nan a trece e punto aki na minister di enseñansa. “El a bisa el lo tume den consideracion. Nos ta bisa esaki no ta manera di trata un trahado cu ta traha den veld di enseñansa”, el a expresa.

Finalisando Alebrtus a indica cu tabata un bon reunion caminda nan por a papia abierto cu otro y como SIMAR, Albertus a subraya, no semper nan ta di acuerdo cu minister di enseñansa, pero nan lo sigui sinta dialoga cune mirando cu e ta esun responsabel cu e carerta di enseñansa.

“Nos como SIMAR lo keda critico tambe como un sindicato riba e maneho di nos minister di enseñansa teniendo cuenta cu e posicion huridico di e miembronan, teniendo cuenta cu e parti di enseñansa den su totalidad pa asina nos por sigui brinda un enseñansa di calidad y tambe riba e parti social pasobra esey ta e puntonan cu tin den nos statuut”, el a finalisa.