Abigail Peterson y otro dos studiante di Facultad di Hospitality and Tourism Management di Universidad di Aruba ta organisando un proyecto pa duna apoyo Fundacion Contra Violencia Relacional (FCVR) cu un donacion di diferente articulonan y cuminda.
Megan Thijsen a splica cu awe diasabra 26 y mañan diadomingo 27 di maart for di 9or di mainta te cu 2or dia tardi nan lo colecta diferente articulo y cuminda cu por wordo duna na e fundacion aki.
Na mesun tempo nan kier trece conscientisacion den comunidad pa motibo cu durante pandemia e casonan di violencia domestico a aumenta considerablemente caminda cu nan kier pa comunidad tin conocemento cu e fundacion aki ta pa yuda cualkier persona cu ta pasando den un momento dificil.
Esmay Mac Janet e di tres studiante den proyecto aki a conta cu e evento lo tuma luga na e parkinglot mes di Universidad di Aruba unda nan lo colecta cuminda, paña, coy di hunga, y otro articulo cu por wordo utilisa pa un otro persona of mucha, como por ehemplo pampers, baby food of wipes cu lo ser entrega na e fundacion como parti di un donacion pa asina ey e fundacion lo por habri un shelter nobo y yuda mas famianan cu por presenta problemanan den nan circulo familiar.
