Den conferencia di prensa di minister di Turismo y Salud, Dangui Oduber dialuna ultimo, Oduber a trece dilanti un proyecto relaciona cu ponemento camaranan di seguridad den henter e area turistico, mirando cu indice di criminalidad y atraco ta aumentando.

Pa garantisa cu Aruba ta keda como un di e destinacion faborito di turistanan, Oduber a menciona cu nan kier cuminsa un proyecto “costoso” den transcurso di e añanan aki pa pone camaranan di seguridad den tur area turistico. Esaki ta den palabracion cu Ministerio di Husticia y ATA, pa asina wak con lo cuminsa presupuesta e fondonan pa tin camaranan den area turistico na momento cu e actonan criminal ta tuma luga.

Pa cu esaki, parlamentario y lider di fraccion di partido MAS, Marisol Lopez-Tromp den un entrevista cu Bon Dia Aruba a splica cu na momento cu el a mira riba rednan social e anuncio di un proyecto tocante camaranan di seguridad, “minister Oduber ta papia di nos comosifuera cu ta su iniciativa, su proyecto, unda e ta bay papia cu ministerio di Husticia y ATA. Y esaki ta algo cu tin su tempo caba”.

E minister cu ta encarga cu e partinan di camara y seguridad den tur e añanan aki ta minister di Husticia, pa motibo cu esaki ta hancra den ley tambe, unda pa pone camara cu ta graba y ta wordo controla den areanan publico ta mara na cierto aspectonan di ken por maneha nan, ken ta autorisa pa usa e imagennan aki, ken ta bay traha cu nan, unda ta bay ubica nan, etc.

Otro aspecto cu Lopez-Tromp a mira ta cu ta bon pa minister Oduber bin cu proyecto nobo, mirando tur e robo y delincuencia cu tin na Aruba awendia. Y den su rol di minister, e ta enfoca completamente riba e parti turistico, “e cual mi ta kere ta importante pasobra ta menciona areanan turistico. Pero mi ta kere e seguridad mester ta pa tur hende, henter pueblo cu ta frecuenta e areanan ey, turistanan y hende local tambe”, Lopez-Tromp a comenta.

E parti cu Lopez-Tromp ta haya importante ta cu tin un proyecto bieu cu no a funciona, e cual e ta considera como “placa benta afo” – pa algo pa cual a usa placa, cu a wordo instala na diferente areanan di Aruba. E camaranan aki tabata frustia y den mal estado, cu no ta funciona pa basta aña caba. “Esaki ta un proyecto cu a inicia door di minister Arthur Dowers bin ariba. Mi ta corda e inicio di e proyecto aki, e intencion y tambe e ley cu a wordo introduci p’e pa regula con e ta bay wordo haci, con e ta bay wordo usa, kico meta ta, entre otro cu na comienso e camaranan aki lo a cuminsa traha na diferente lugar y crusada. Pero despues di esaki mi no sa kico a pasa y mi a haci pregunta den parlamento ora Andin Bikker a tuma e cartera over.”

A medida cu tempo a pasa por a mira cu e camaranan no ta trahando, manera a menciona caba, caminda Lopez-Tromp a manda 10 pregunta dirigi na minister Bikker dia 4 di augustus di 2021, tempo cu e tabata den funcion di minister demisionario, despues cu den parlamento Bikker no a contesta su preguntanan di manera satisfactorio. Entre otro, el a puntra for di ki tempo e camaranan ta trahando of no? Cuanto placa tin inverti aden? Ken a instala e camaranan? Tin contract andando? Cu ken? Ainda nan ta wordo paga? Etc.

El a señala cu Bikker a contesta un parti di e preguntanan unda cu consecuentemente el e pidi pa e por haci un LOB (Landsverordening Openbaarheid van Bestuur), caminda un ciudadano of un persona por pidi pa haya bista di e documentonan pa e cual el a manda e carta, y te ainda e no por haya contesta.

E tempo aya, Bikker a contesta na Lopez-Tromp cu e no tabatin e documentonan y cu supuestamente FDA (Fondo di Desaroyo di Aruba) lo tin nan, unda e mester a tuma contacto cu nan y na final e no a haya e documentonan en cuestion.

Despues, minister a cambia y na momento cu a nombra Rocco Tjon como minister di Husticia, Lopez-Tromp a manda e mesun preguntanan, caminda el a contesta un parti di nan y e contesta riba e camaranan, el a referi na ex-minister Bikker. “Mi intencion tabata pa e contesta e preguntanan aki como minister actual, pasobra el e tuma e proyecto – of loke a keda di e proyecto.”

Na november di 2021 e contestanan di minister actual Rocco Tjon tabata cu segun su opinion, e camaranan a yega di funciona, pero nan a haya retonan. Lopez-Tromp tambe a pidi pa bishita e camera room y ta pendiente pa haya un contesta.

Ora el a wak e anuncio di minister Oduber, “mi a haya esaki algo hopi particular, no pasobra cu no lo ta necesario pa tin un seguridad di camara, pero kico a pasa cu e proyecto bieu? No a funciona y bo ta anunciando un proyecto nobo?”, el a expresa.

Igualmente, el a bisa cu nan cu ta forma parti di Parlamento, nan tin cu controla a base di e maneho cu ta bisa con e placa a wordo usa y si ta bon usa. “Si esaki no a bay bon, ki otro solucion tin of ta bay para e proyecto? Esey pa mi nunca tabatin claridad 100%”, el a sigura.

Tin problema di criminalidad y hortamento den areanan turistico, unda ta horta turistanan, tin kiebro di autonan, delincuencia, entre otro. Dscusion tocante criminalidad, e discusion no ta cu e camaranan no ta necesario, manera el a ripiti. “Solamente cu e ta mara na proceduranan y ley, na unda mi kier haya sa kico a pasa cu e proyectonan di camaranan bieu cu minister Oduber a yega awor cu un proyecto nobo. Ta importante pa combati criminalidad y delincuencia, pero kico a pasa cu e camaranan bieu?”, el a finalisa.