(ElNacional) – Gobierno di Nicolas Maduro a fabrica un documento pa vincula e opositor Juan Guaido cu e presunto narcotraficante Italo-Venezolano Biagio Benito Garofalo Forte. Asina un investigacion di Cazadores de Fake News a determina.
E organisacion, dedica na verifica e validez di informacionnan cu ta wordo publica na e pais, a indica cu un di e pruebanan ta e supuesto firma di Guaido cu cual lo a aproba e desigancion di Guaido como coordinador municipal di Voluntad Popular na municipio Anaco di e estado Anzoategui.
Cazadores de Fake News a determina cu riba internet no tin ningun documento disponibel cu ta certifica cu Guaido a usa e firma ey prome cu aña 2019. Por lo tanto, el a cuminsa haci uso di e firma aki ariba carta-, comunicado- y documentonan oficial despues cu el a huramenta como presidente interino di e Republica.
E documento presenta siman pasa pa Jorge Rodriguez , presidente di e Asamblea Nacional eligi na 2020, tin fecha di 16 di januari 2016.
Otro aspecto señala pa Cazadores de Fake News ta cu Guaido nunca a ocupa e puesto di secretario di Voluntad Popular pasobra e cargo ey no ta existi den e partido politico. Den e documentonan oficial ta aparece cu e cargo cu e lider opositor a ocupa entre 2012 y 2017 tabata di responsabel di organisacion nacional of director di organisacion nacional.
Guaido a reacciona riba e investigacion y a ratifica su rechaso na e manipulacion di documentonan pa involucra e directornan di oposicion den situacionnan iregular. Ademas di esey, usa e medionan di e Estado pa gaña e poblacion.
“Censura, persigui periodistanan, cera medionan di comunicacion, no duna papel na corantnan, cumpra medionan cu placa di corupcion y como si esey no ta suficiente, fabrica documentonan y gaña for di medionan di e Estado. Y ainda asina nan a perde Barinas, nan ta minoria y e Corte Penal Internacional ta señala nan”, e opositor a manifesta riba Twitter.
