Durante Conferencia di Prensa di Gobierno di Aruba dialuna mainta, Prome Minister Evelyn Wever-Croes a presenta e ‘Jaarverslag 2021’, Relato Anual 2021 di su ministerio. Esaki ta e relato di e trabaonan di e ministerio cu ta resorta bao di Prome Minister, a eherce durante di aña 2021.
Esaki ta e di 4 aña cu Prome Minister ta publica e relato anual di su ministerio desde 2018. Despues di e prome relato, el a publica cada aña.
Prome Minister a indica cu e relato anual aki a wordo presenta na Parlamento pa Parlamentarionan por hay’e den curso di dialuna mes pa nan por tuma nota di dje y pa nan ta informa kico tur e ministerio di asuntonan general ta atende cune.
E relato anual ta wordo publica tambe riba e website ‘Prime Minister’s Office’ pmo.arubagov.org pa asina tur hende por tin acceso na dje.
Tambe por wordo haya riba e Plataforma ISSUU na unda por download e y tambe por click e link riba pagina di Facebook di Gabinete Wever-Croes pa yega na e relato anual. Esnan cu ta desea, por solicita esaki y lo por ricibi’e via email via un link. Tambe, e lo bay Biblioteca Nacional y e lo wordo registra na BUVO. Esaki, pa asina e ta accesibel tur caminda pa pueblo por tuma nota di dje.
Relato Anual 2021 di Ministerio di Asuntonan General, ta contene relato amplio di Integridad te cu na momento cu el a wordo pasa pa Minister Ursell Arends na september. Organisacion Gubernamental, ta e trabaonan cu tin di haber cu organisacion di Gobierno. Innovacion. Energia, te na momento cu esaki a wordo pasa pa Minister Glenbert Croes na september. Infrastructura y Planificacion Teritorial. Milieu, te ora esaki a wordo pasa pa Minister Arends.
“Aña 2021 tabata un aña hopi particular na unda cu tabata tin hopi plan. Sinembargo pa motibo di Covid, nos a wordo limita hopi den ehecucion di varios plan. Tambe e hecho, cu Gobierno a cay 30 di maart y eleccion a tuma luga dia 25 di juni, a pone cu durante e periodo di maart y september 2021, solamente por a atende cu ‘lopende zaken’, dus cu asuntonan coriente y niun aspecto nobo. Pero por tuma nota tambe cu hopi trabaonan a wordo haci y plannan concretisa y por lesa esakinan den e Relato Anual 2021”, Prome Minister Evelyn Wever-Croes a duna di conoce.
