Dienst Uitvoering Onderwijs cu bishita den Caribe atrobe; Studiantenan di Aruba por tuma contacto pa medio digital

Dienst Uitvoering Onderwijs (DUO) ta organisa un webinar pa futuro studiantenan di Aruba (y Corsou) cu ta planeando pa sigui studia na Hulanda. E entidad a bisa cu e webinar aki ta continuacion di encuentronan di informacion cu a tene na November aña pasa.

E informacion aki a bin hunto cu e anuncio cu DUO lo ta bishitando Boneiro y Isla Riba, esta St. Maarten, Sint Eustatius y Saba na April. DUO ta habri un oficina di servicio temporal riba e islanan aki pa papia cu futuro y ex-studiantenan. Ademas DUO ta organisa encuentronan di informacion tambe y ta ofrece asistencia personalisa pa problemanan di pago na e sitionan. E bishita ta un continuacion di e bishita na Aruba y Corsou na 2021. “Pa futuro studiantenan riba e islanan aki DUO ta organisa un webinar awor,” vocero di DUO a informa.

Encuentronan di informacion

E encuentronan di informacion ta enfoca riba studiantenan cu ta bay studia na Hulanda y nan mayornan. Durante e encuentronan nan ta haya tur informacion tocante financiamento di estudio y otro asuntonan cu nan mester regla na Hulanda. Na Sint Maarten ta tuma luga tambe un encuentro di informacion pa ex-studiantenan. Durante di esaki ta duna entre otro informacion tocante e posibilidadnan pa pidi un midimento di capacidad financiero, pagamento back localmente y kico mester haci ora tin problema cu pago.

Oficina di servicio temporal

Personanan por pasa na e oficinanan di servicio temporal cu tur nan preguntanan tocante financiamento di estudio Hulandes y pago back di nan debe di estudio. Pa bishita un oficina di servicio no tin mester di traha un afspraak. Ex-studiantenan mester bin cu un prueba di identidad si. Y si nan kier pidi reduccion di e montante mensual, nan mester trece tambe un resumen di nan entrada. Di e manera ey DUO por yuda e grupo di enfoke mesora si esey ta posibel.

Ayudo personalisa

DUO kier yuda preveni cu ex-studiantenan ta haya nan den problemanan financiero. P’esey ex-studiantenan cu un atraso den pago cerca DUO ta haya un ultimo oportunidad pa evita cu ta pone esaki den man di un oficina di incasso. Un parti di nan ta haya un invitacion di DUO pa bin papia cu un colaborado pa yega na un solucion na midi.

Pa loke ta studiante y ex-studiantenan di Aruba y Corsou, nan por tuma contacto via chat y videocall cu DUO.