(AP) – Corte na Moscu a prohibi Facebook y Instagram riba dialuna pa loke nan ta clasifica como actividad extremista den un caso contra e compania Meta.
Tverskoy District Court a cumpli cu e peticion di fiscalnan pa haci Meta Inc. ilegal y prohibi Facebook y Instagram pa loke nan ta yama “actividad extremista.” Fiscalnan Ruso a acusa e plataformanan di rednan social di ignora e peticion di gobierno di kita loke nan ta describi como noticia falso tocante accion di militarnan Ruso na Ucrania y yamadonan na protestanan contra guera na Rusia.
E corte su sentencia ta prohibi Meta di habri oficinanan y conduci negoshi na Rusia. Meta a rechasa di comenta ora cu nan a ser contacta pa The Associated Press. Fiscalnan no a haci peticion pa prohibi e servicio di mensahe WhatsApp di Meta. E autoridadnan tambe a enfatisa cu nan no tin intencion di sanciona individuonan Ruso cu ta haci uso di Facebook ni Instagram.
Instagram y Facebook ya caba tabata blokia na Rusia despues cu e pais su reguladornan di comunicacion y media Roskomnadzor a bisa cu nan ta ser usa pa haci yamado di violencia contra soldaatnan Ruso. Ademas di blokia Facebook y Instagram, autoridadnan Ruso tambe a cera e acceso na websitenan, incluyendo BBc. Voice of America y Radio FRee Europe-Radio Liberty, entre otro.
