(NLTimes) – Edificionan cu ta propiedad di e famia real di Hulanda lo ser usa como vivienda pa refugiadonan di Ucrania, fuentenan cercano di e famia a conta De Telegraaf y RTL Nieuws.

E decision a keda anuncia riba dialuna atardi pa e gobierno su oficina di prensa. Pa awo, e refugiadonan no lo keda na Villa Eikenhorst, e cas na Wassenaar di Rey Willem-Alexander y Reina Maxima, na luga di esaki nan lo haci espacio disponibel na Het Oude Loo, cual ta riba tereno di e palacio na Apeldoorn. “Nos ta premira cu 6 pa 8 famia of 20 pa 30 persona lo por haci uso di e edificio aki,” e oficina di prensa a bisa den e declaracion. E cambernan den e kasteel di siglo 15 por ser usa di cualkier manera cu e famia real desea.

Oficialmente, e trato a ser haci entre e rey, e cas Real, e ciudad di Apeldoorn, Noord y Oost Gelderland Security Region, organisacion di buscado di asilo COA y Rijksvastgoedbedrijf, e agencia di vivienda nacional.

Siman pasa, Rey Phillippe y Reina Mathilde di Belgica a anuncia cu nan lo haci 3 di nan propiedad disponibel como asilo pa famianan di Ucrania cuminsando for di April. E propiedadnan ta na Bruselas y Wallonia, ademas di un edificio cu tabata ser usa como un cas di vakantie na Tervuren.

Durante su conferencia di prensa regular, Prome Minister Mark Rutte a ricibi e pregunta tocante e posibilidad cu e Rey y Reina Hulandes lo brinda ayudo na e refugiadonan. El a nenga di haci speculacion tocante e posiblidad, y a bisa cu e no lo revela detayenan tocante su conversacionnan priva cu e miembronan di e famia real. “Esaki a yega di pasa den pasado. Reina Wilhelmina a haci esaki durante e temporada di e di dos guera mundial,” Rutte a bisa.

Mas o menos 1,700 famia na Hulanda ya caba a habri nan hogar pa refugiadonan di Ucrania. Esunnan cu ta kedando cu e famianan aki ta ricibi 135 euro pa gasta pa siman, mientras cu e personanan den shelter di e municipalidadnan ta ricibi 60 euro pa siman.

Anteriormente e luna aki, Rey Willem-Alexander y Reina Maxima a bishita e personanan di Ucrania cu a yega Hulanda, pasando tempo cu nan na e base militar na Ede. Tambe nan a reuni cu algun persona pa un dialogo na Noordeinde Palace. Reina Maxima a bishita un scol na Den Haag cual a ser traha pa provee muchanan di Ucrania cu un educacion. Siman pasa, el a bishita tambe un recepcion di refugiado na RAI cu alcalde di Amsterdam Femke Halsema.