Organisacionnan di dunadonan di trabao na Aruba ta sostene e entidad di COHO, pero kier garantia di politiconan Hulandes cu berdad e entidad por cumpli cu e palabracionnan haci den e landspakket. Y pa Senador Boris Dittrich, e ta comparti e mesun pensamento. Pero cu miembro di Eerste Kamer ta adverti si cu decisionnan no ta bay ta facil.
Dittrich a combersa cu Bon Dia Aruba durante e bishita cu e delegacion di Eerste Kamer pa Relacionnan den Reino a haci na Aruba. E Senador a bisa cu realidad di Aruba ta cu tin hopi gasto y e entradanan no ta suficiente. Y a discuti e tema aki cu organisacionnan di dunado di trabao y trahadonan durante su bishita na Aruba.
“E solucion no ta pa Hulanda djis duna placa y absolve Aruba di e debenan. Esey no por, pasobra e Hulandesnan na Europa lo no acepta. Na Hulanda Europeo tambe tin pobresa cu ta creciendo.”
Sinembargo, Dittrich ta sinti cu hendenan na Aruba ta compronde e realidad. Pero no ta cuestion di pone mas presion riba e Arubiano. “Turismo ta creciendo atrobe, y ta net eynan mester busca e fondonan necesario pa problemanan agudo.”
Den su concepto, hotelnan mester contribui cu un asina yama ‘tarifa di desperdicio.’ Pero mas cu djis bin cu un tarifa, e ta esencial pa cobra esaki tambe. E ta obvio, segun e Senador Hulandes, cu na Aruba tin reto pa cobra. “Tin asina hopi turista cu ta bini hunto cu ta afecta e planta di purificacion di awa por ehempel, eynan ta unda e problema ta. Y no por djis bin cu un belasting adicional riba e comunidad di Aruba mes, pasobra pakico ta e pueblo lo mester paga.”
Boris Dittrich a bisa cu ta na mas pais ta cobra e turista directamente pa uso di e infrastructura di un pais. “E propietarionan di hotel lo bisa cu tur e cobranzanan aki lo pone cu turistanan ta keda sin bin Aruba pasobra e isla ta bira mucho caro. Pero ami no ta kere cu esey lo ta e caso. Hopi Mericano conoce Aruba, nan kier bin Aruba. Pakico nan ta dispuesto pa paga 20 dollar pa un cocktail y no un solo suma di 20 dollar pa contribui na infrastructura di Aruba. Mi ta kere cu tin hopi posibilidad.”
Dittrich a bisa cu berdad e mensahe di Hulanda direccion Aruba no ta esun mas popular, pero hendenan na Aruba tambe kier wak resultado. Y e resultado no por ta cu unicamente e caha di Gobierno ta drecha, pero nan calidad di bida no. “Si mira e peso di Gobierno na Aruba, cu tur e ambtenaarnan, unicamente e ta contribui na mas burocracia y ta haci’e mas caro pa e empresarionan tambe.”
Consecuentemente, su conclusion despues di a reuni cu diferente organisacion ta cu tin un sosten pa COHO. Di otro banda, COHO mas bien por dicidi riba e fondonan cu Hulanda lo pone na su disposicion pa yuda den e reformanan na Aruba. E entidad lo no tin autoridad riba Gobierno ni Parlamento di Aruba. Pero asina mes, Dittrich a bisa cu el a sinti cu diferente organisacion na Aruba ta spera hopi di COHO. “A bisa nos claramente cu tin apoyo pa COHO y e landspakket. Pero pa nos como miembronan di Eerste Kamer, nos no por trece amienda den e ley. Nos lo por entrega mocion pa Gobierno, pa percura cu ta monitorea e proceso hopi di cerca. Pero nos a tende si na Aruba, cu esnan den sector priva lo kier haya siguransa cu ta sigui cu e palabracionnan haci. Implementacion ta mas importante cu bin cu ideanan nobo. E ta conta pa tur politico. Nos como politiconan ta gusta bin cu idea, pero ta lubida cu esnan cu a bin prome cu nos tambe tabatin idea nobo. No tin sentido pa bin cu pensamento nobo sino sigura cu locual tin riba mesa por fin keda ehecuta. Y si e implementacionnan ta keda atras, mester tin e incentivo financiero pa forsa esaki.”
Den concepto di mr. Dittrich, sin e incentivonan aki, historia a mustra cu ta bolbe sin keda haci e reformanan necesario.
