A pesar di tur advertencia y suplica di parti di Fundacion Parke Nacional Aruba y otro organisacionnan ambiental, ainda antisocialnan ta subi Sasarawichi y Franse Pas cu vehiculo pa haci ‘off roading.’ Por mira e marcanan di auto cu ta ‘spin’ den e lodo na Sasarawichi cu ta un area proteha.
“Esaki ta un problema pa naturalesa,” Gerente di FPNA Natasha Silva a bisa Bon Dia Aruba. “Por ehempel, e presencia di vehiculo y zonido ta spanta fauna. E azeta di e vehiculonan ta basha riba e areanan aki y ta contamina e area (cu ademas ta absorba esaki y mescla e kimico cu awa).” Silva a bisa cu ademas di tur esaki, e abuso di tereno di parti di chauffeurnan cu ta haci deporte cu nan vehiculo ta destrui matanan chikito. “Un ehempel ta e banana di rif cu ta un mata protegi y otro especie.”
E problema di e actividad aki ta cu ta destrui y elimina e parti mas exponi di e saliña. E asina yama ‘top soil’ ta keda tur plama of hasta elimina. Consecuentemente ta afecta henter e ecosistema. “Ademas, ta destrui holnan di cangreu y di shoco, cu tur su consecuencianan.”
FPNA tambe ta preocupa cu e duinnan di Aruba. Ta areanan di sero di santo cu poco poco ta desapareciendo pa motibo di actividad di trafico di motor, sin cu autoridadnan ta tumando paso.
Mester bisa cu Minister di Trafico, Integridad, Naturalesa y Cuido di Anciano, Ursell Arends a bisa cu ta na Juli proximo apenas lo atende cu e rapport cu Gobierno mes a laga traha riba UTV y nan impacto riba naturalesa. En todo caso, e mesun UTVnan aki mescos cu otro vehiculo ta coriendo riba duinnan di Aruba cu ta obvio, ta hopi susha y afecta.
