Recientemente durante un conferencia di prensa Minister Rocco Tjon a trata diferente aspecto caminda e ta indica cu Gobierno ta sigui traha riba seguridad di nos frontera. Banda di cooperacion mas estrecho entre e diferente departamentonan, el a informa cu nos radarkamer awor lo ta ocupa 24 ora pa dia y cu nos costanan ta keda patruya debidamente.

Loke sigur a capta mi atencion ta e meta di crea un departamento multidisciplinario pa loke ta inteligencia y informacion cu lo bay enfoca mas den e parti investigativo. Como pais nos mester cuminsa haya un bista mas cla y amplio di e netwerk completo pa loke ta trata ilegalidad. Pa atende cu e aspecto aki debidamente nos mester sa kennan ta drentando nos pais na e manera aki, con nan ta drentando nos pais y for di ken nan ta hayando cooperacion.

Segun Minister Tjon e departamento di “Menshandel en Mensensmokkel” di nos Cuerpo Policial lo bay wordo amplia pa e parti di conduci investigacion. Meta ta pa haci un intento pa drenta nos pais bira uno menos atractivo pa e personanan en cuestion y tambe esunnan cu ta yuda nan drenta nos isla na un forma ilegal. Esaki sigur ta algo cu mi ta aplaudi y ta haya sumamente necesario.

Mi ta subraya e necesidad pa nos hiba un maneho mas strigente ora ta trata ilegalidad door di entre otro elimina dunamento di waarschuwing ora haya un doño di trabou cu un empleado den servicio cu ta indocumenta. Minister Tjon a anuncia cu e consecuencia, den forma di un multa lo ta uno mucho mas halto y cu ya caba diferente compania a ricibi multanan cu a yega te cu 75.000 Florin. Cu bo no mag di tin un indocumenta den servicio ta algo cu nos no mester tolera mas. Ta ampliamente conoci cu esaki ta contra tur regla y fatsoen. Pesey mes mi ta haya e anuncio di bestuurlijke boete, sumanan substancial, uno cu sigur lo fungi como un remmiddel pa continua cu e practicanan aki. Si nos logra maneha e situacion di ilegalidad esaki sigur lo trece su beneficionan cu ne, no solamente pa caha di gobierno pero tambe pa entre otro nos mercado laboral interno y AZV (gastonan di pa cuido medico di ilegalnan).

Otro aspecto di e maneho nobo cu a keda anuncia ta cu lo bay actua mas fuerte y duna multanan mas halto na tur persona cu ta facilita e personanan indocumenta, den forma di estadia ilegal of cu ta brinda cualkier otro tipo di ayudo. Hopi biaha ta mira Gobierno y Parlamento pa trece solucion of brinda alivio pero e problematica di ilegalidad ta uno cu hunto so nos por combati’e y si nos tur ta asumi nos responsabilidad. Di un ilegal no ta haya trabou, cas pa biba, etc etc e no lo keda riba nos isla. Pero ta nos mes ta haci cu nan ta bin y keda. Pesey mes mi ta di acuerdo cu e intencion anuncia cu na momento cu un persona legal/indocumenta wordo gara, lo pasa tur e gastonan cu tin di haber cu e situacion, pa e persona local cu a yuda e persona indocumenta.

Mi ta termina enfatisando un biaha mas cu e problematica di ilegalidad ta hunto nos mester atende y soluciona. Ta mucho tempo tin ta papia di e problematica aki cu durante di aña a keda aumenta.