Minister di Husticia Rocco Tjon: Lo atende situacion di arma den su totalidad y no solamente un pidi pa entrega arma boluntariamente’

Minister di Husticia den Parlamento a trece dilanti topiconan delicado bao di nos hobennan, cual no ta algo facil.  E maneho di arma na Aruba ta basa riba diferente punto y tin un plan den su totalidad cu lo atende cu esaki y no solamente pa pidi armanan boluntariamente den comunidad.

Minister Rocco Tjon ta kere cu na prome luga mester fortifica e seguridad na frontera di Aruba mirando cu na final di dia e arma ta drenta via frontera.

Pa e motibo aki mes Minister di husticia ta duna di conoce cu e ta enfoca den e parti aki hopi mas fuerte mirando cu mester corta e entradanan di arma for di rais y no solamente loke cu tin riba caya. Na momento cu kita esnan riba caya e entrada di arma ta keda y e ora ta un maneho di hiba awa lama si no atende cu e parti aki for di rais cu ta e frontera nan unda cu e armanan ta drentando.

Mas cu claro tuma accion pa entrega armanan boluntariamente di un maneho cu ya caba den pasado a tuma luga y Parlamentario Molina su deseo ta pa sigui cune, sigur lo keda un maneho manera cu ya caba e ta. Sinembargo esey no ta solamente e problema realmente pa combati situacion di armanan di candela na Aruba.

Aruba a ricibi 4 miyon euro extra pa fortifica e frontera nan di Aruba pa tur loke ta drenta illegal, no solamente arma , pero droga y ilegalnan cu tambe ta drenta den un forma illegal na Aruba y ta haci un efecto riba e pais.

Tambe tin un plan pa inverti den departamento di informacion y inteligencia debi cu abase di esey por controla di unda e ta drenta pa por atende cu e traficacion di arma y abase di e maneho di ministerio publico ta bin un maneho hopi mas estricto contra di tur situacionnan cu tin di haber cu violencia y tur situacion cu tin di haber cu arma.

Di e manera aki na momento cu un caso yega dilanti di hues e castigonan cu ta wordo exigi door di ministerio publico ta castigonan mucho mas fuerte. Di e manera aki, den diferente angulo Minister di Husticia Rocco Tjon ta trata di atende cu e fenomeno den su totalidad y no solamente pidi armanan pa wordo entrega boluntariamente, segun el a informa.

Tur cifra a keda presenta den parlamento unda cu for di 2012 te cu 2021. Den e aña 2021 tabatin 17 arma cu a keda confisca pero na 2015 Aruba tabatin e piek di casi 50 arma . Aki ta caminda cu tin un diferencia grandi for di 2017 te na e momentonan aki. Lo sigui traha structuralmente pa saca resultadonan positivo y banda di esaki lo traha cu nos hobennan pa tin un miho futuro y pa nan ricibi e sosten cu nan tin mester.